Athugið þessi frétt er meira en 2 mánaða gömul.

Helstu takmarkanir og reglur sem tóku gildi á miðnætti

Mynd með færslu
 Mynd: - - Pexels
Samkomutakmarkanir og ýmsar reglur aðrar sem hugsaðar eru til að hamla gegn mikill fjölgun á COVID-19 smitum tóklu gildi á miðnætti í gærkvöld og gilda til og með 13. ágúst að óbreyttu. Hér að neðan má sjá lista yfir allar helstu takmarkanir og reglur sem gilda munu næstu þrjár vikurnar.

Í tilkynningu frá heilbrigðisráðuneytinu segir að reglugerðin sé í samræmi við tillögur sóttvarnalæknis. Mikilvægt sé talið að grípa til takmarkana innanlands eins fljótt og auðið er til að koma böndum á aukna útbreiðslu smita, enda hætt við alvarlegum afleiðingum ef mikið verður um smit hjá viðkvæmum hópum. 

Helstu takmarkanir og reglur sem gilda frá miðnætti:

  • Almennar fjöldatakmarkanir verða 200 manns. Börn fædd 2016 og síðar eru undanþegin.
  • Nándarregla verður almennt 1 metri. Börn fædd 2016 og síðar verði undanþegin.
  • Grímuskylda verður tekin upp víða innanhúss þar sem loftræsting er slæm og/eða ekki er unnt að viðhafa 1 metra reglu. Börn fædd 2006 og síðar eru undanþegin.
  • Hámarksfjöldi viðskiptavina í verslunum verði 200.
  • Heilsu- og líkamsræktarstöðvum sem og sund- og baðstöðum verður heimilt að hafa opið fyrir 75% af hámarksfjölda leyfilegra gesta. Sameiginlegan búnað skal sótthreinsa milli notenda.
  • Söfnum verður heimilt að taka á móti 75% af leyfilegum hámarksfjölda gesta.
  • Íþróttaæfingar og -keppnir barna og fullorðinna heimilar með og án snertinga með 100 manna hámarksfjölda. Hámarksfjöldi áhorfenda 200 manns í rými sem skulu skráðir í sæti. Veitingasala óheimil á keppnisstöðum.
  • Æfingar og sýningar sviðslista og sambærilegrar starfsemi heimilar með allt að 100 manns á sviði. Hámarksfjöldi áhorfenda 200 manns í rými, svo sem í bíóhúsum. Heimilt að hafa hlé en enga veitingasölu í hléum. Skrá skal gesti í sæti.
  • Hámarksfjöldi gesta við athafnir trú- og lífsskoðunarfélaga verður 200.
  • Opnunartími veitingastaða, skemmtistaða o.þ.h. verður til kl. 23:00 (tæma þarf staði fyrir miðnætti) og hámarksfjöldi gesta 100 manns í rými. Vínveitingar bornar fram til sitjandi gesta. Skrá skal gesti.
  • Tjaldstæði og hjólhýsasvæði fari eftir leiðbeiningum sóttvarnalæknis og Ferðamálastofu.

Reglugerðina í heild sinni má nálgast hér.

 

Ævar Örn Jósepsson
Fréttastofa RÚV