Mynd: AP
Hart barist gegn skógareldum í Bandaríkjunum og Kanada
Þúsundir slökkviliðsmanna berjast enn við skógarelda sem geisa í vesturhluta Bandaríkjanna og Kanada.
Í suðurhluta Oregon ríkis reyna yfir 2.100 slökkviliðsmenn að hemja víðáttumikinn skógareld sem nær ný yfir rúmlega ellefu hundruð ferkílómetra, stærra landsvæði en New York borg. Aðeins hefur náðst að ráða niðurlögum eldsins á um sjö prósentum landflæmisins, segir í frétt AFP. Mikill hiti, þurrkur og hvassviðri hamlar slökkvistarfi.
Mynd: AP
Um hundrað slökkviliðsmenn frá Mexíkó eru komnir til Kanada til aðstoðar í slökkvistarfi í norðvestanverðu Ontario.
Mynd: AP
Eldar loga á yfir 300 stöðum í vestur hluta Bresku Kólumbíu, þar af 15 sem kviknuðu á undanförnum tveimur dögum. Spáð er háum hita á næstu dögum á milli Alberta og Ontario, þó ekkert í líkingu við það sem sást fyrir þremur vikum þegar hitinn fór mest í 49.6 gráður í grennd við Vancouver.
Veðurspáin í Kaliforníu gerir ráð fyrir eldingum sem gætu komið af stað frekari skógareldum í þurrkinum í ríkinu.
