Athugið þessi frétt er meira en 10 mánaða gömul.

Heildarafli í júní 21% minni en í júní 2020

Mynd með færslu
 Mynd: RÚV - Ágúst Ólafsson
Heildarafli í júní 2021 var 49 þúsund tonn og nemur það samdrætti upp á 21% frá því í júní 2020.

Verulegur samdráttur í uppsjávarafla

Þetta kemur fram á vef Hagstofu Íslands. Botnfiskafli í júní var nær óbreyttur frá fyrra ári, tæp 35 þúsund tonn. Af botnfisktegundum veiddist mest af þorski eða tæp 20 þúsund tonn. Uppsjávarafli dróst verulega saman, um 54% í júní og var mestmegnis kolmunni eða 5.900 tonn, og svo makríll upp á rúm 4.100 tonn.

Landaður afli eykst milli ára

Á tólf mánaða tímabili, frá júlí 2020 til júní 2021, reyndist landaður afli alls vera tæplega 1,1 milljón tonn og er það 4% meira magn en var landað á sama tólf mánaða tímabili ári áður. Þar af var uppsjávarafli um 562 þúsund tonn, botnfiskafli 483 þúsund tonn og flatfiskafli tæp 25 þúsund tonn.

Aflinn í júnímánuði á þessu ári metinn á föstu verðlagi bendir til 4,4% minni verðmæta miðað við júní í fyrra, samkvæmt bráðabirgðatölum Hagstofunnar.