Athugið þessi frétt er meira en 2 mánaða gömul.

Bólusetningaráhugi vex í Frakklandi

epa09180602 French President Emmanuel Macron (L) visits a COVID-19 vaccination center during its inauguration at Porte de Versailles convention centre in Paris, France, 06 May 2021. The French BFPP fire department is in charge of the giant center, the first of this type in the capital.  EPA-EFE/CHRISTOPHE ARCHAMBAULT / POOL  MAXPPP OUT
Emmanuel Macron forseti fylgist með í bólusetningarmiðstöð í Versölum. Mynd: EPA-EFE - AFP
Umsóknum um að komast í bólusetningu gegn kórónuveirunni hefur fjölgað til muna eftir að Macron forseti tilkynnti um hertar ráðstafanir vegna fjölgunar smita. Á næstunni kemst fólk ekki á kaffihús, í líkamsrækt eða bíó nema það geti sannað að það sé með mótefni gegn veirunni.

Meðal þess sem forsetinn tilkynnti á mánudagskvöld var að heilbrigðisstarfsfólk yrði skikkað í bólusetningu. Þá fá þeir einir sem geta framvísað bólusetningarskírteini eða innan  við tveggja sólarhringa neikvæðu COVID-prófi að nota almenningssamgöngur, fara á veitingastaði eða kaffihús, í bíó, líkamsrækt, leikhús og á aðra menningarviðburði svo nokkuð sé nefnt. 

Fjöldi Frakka hefur til þessa verið andsnúinn því að láta bólusetja sig, en á mánudagskvöld snerist dæmið við hjá mörgum. Þúsundir fóru á netið og bókuðu tíma. Á nokkrum klukkustundum eftir ávarp Macrons forseta bókuðu til dæmis 926 þúsund sig í bólusetningu á Doctolib-vefnum og hundruð þúsunda til viðbótar daginn eftir, margir reyndar úr heilbrigðisstéttum.

Tilskipunin um bólusetningarvottorðið gildir frá næsta miðvikudegi, nema fyrir börn og ungmenni á aldrinum tólf til sautján ára. Þau fá frest til 30. ágúst. Bólusetning hefur staðið unglingum til boða síðustu vikur að því tilskildu að þeir hafi leyfi frá foreldrum og mæti með öðru hvoru þeirra þegar komið er í stunguna. 

asgeirt's picture
Ásgeir Tómasson
Fréttastofa RÚV