Skrifstofa ræðismanns Eistlands í Sankti Pétursborg. Mynd: EPA-EFE - EPA
Athugið þessi frétt er meira en 1 ára gömul.
Rússar vísa ræðismanni úr landi
Mart Latte, ræðismanni Eistlands í Sankti Pétursborg, var í dag vísað frá Rússlandi. Leyniþjónusta landsins tilkynnti í gær að hann hefði verið handtekinn þegar hann tók við leyniskjölum af rússneskum ríkisborgara. Ræðismaðurinn hefur tvo sólarhringa til að fara á brott.
AFP fréttastofan hefur eftir talsmanni utanríkisráðuneytisins í Tallinn að enginn fótur sé fyrir ásökunum Rússa. Þær séu einungis nýjasta ögrun þeirra gagnvart vestrænum ríkjum.
Fyrr á árinu var ræðismaður Úkraínu í Sankti Pétursborg rekinn úr landi eftir að leyniþjónustan FSB tilkynnti að hann hefði verið gripinn við að reyna að verða sér úti um viðkvæmar upplýsingar frá rússneskum ríkisborgara.
