Athugið þessi frétt er meira en 1 mánaða gömul.

Fækka bensínstöðvum í borginni

24.06.2021 - 21:29
Mynd með færslu
 Mynd: Guðmundur Bergkvist - RÚV
Bensínstöðvum í Reykjavíkurborg mun fækka um þriðjung á næstu árum, úr 45 í 30. Stórir reitir þeirra í íbúðahverfum munu fara undir hverfistengda þjónustu og íbúðir. Samkomulag um þessar fyrirætlanir var undirritað í dag.

Reykjavík á sennilegast heimsmet í  í fjölda bensínstöðva miðað við íbúafjölda. Fyrir tveimur árum gerði borgin öllum olíufélögunum tilboð um að leggja hluta þeirra niður. Dagur B. Eggertsson, borgarstjóri segir þetta styðja við stefnu borgarinnar í loftslagsmálum og grænni þróun. 

„Við buðum upp í samstarf um að uppbygging kæmi í staðinn. Þ.e. íbúðir og hverfistengd þjónusta og þetta er núna að ganga eftir. Við vorum að samþykkja í dag samninga um að fækka bensínstöðvum í Reykjavík um einn þriðja. Þriðja hver bensínstöð verður að einhverju öðru“

Fyrst hverfa bensínstöðvar sem eru inni í hverfum og nálægt leiksvæðum og gönguleiðum barna en stöðvar sem eru við stofnbrautir verða áfram.

„Það má segja að við séum þarna að beita grænum hvötum. Við segjum að ef að þau eru tilbúin að leggja af rekstur á þessum stað og rífa byggingarnar sem kostar þau auðvitað eitthvað þá fái þau á móti byggingarrétt en við í gegnum skipulagsvaldið viljum tryggja að það sé þá í þágu samfélagsins.“

Dæmi um stöðvar sem verða fyrstar til að hverfa eru við Stóragerði, Háaleitisbraut, Álfheima, Ægisíðu, Skógarsel og Norðurfell. 

„Fyrst þarf að samþykkja deiliskipulag og stilla upp hugmyndum sem verða kynntar íbúum á hverjum stað og það mun taka einhvern tíma. En ég á ekki von á öðru en að borgarbúar fagni þessu. Það hefur verið kallað eftir því að sumar af þessum stöðvum fari og ef að okkur tekst í samvinnu að koma með eitthvað skemmtilegt og gott í staðinn eins og íbúðir fyrir ungt fólk og fyrstu kaupendur og ýmsa hverfistengda þjónustu að þá hugsa ég að þetta geti gengið hratt og vel.“

 

Mariash's picture
María Sigrún Hilmarsdóttir
Fréttastofa RÚV