Athugið þessi frétt er meira en 1 mánaða gömul.

Eiður í leyfi: „Ábyrgðin liggur hjá mér“

Mynd með færslu
 Mynd: RÚV

Eiður í leyfi: „Ábyrgðin liggur hjá mér“

16.06.2021 - 15:09
Eiður Smári Guðjohnsen, aðstoðarþjálfari karlaliðs Íslands í fótbolta, er farinn í tímabundið leyfi frá störfum hjá KSÍ en snýr aftur af fullum krafti í verkefnum haustsins.

Þetta kemur fram í fréttatilkynningu sem Knattspyrnusambandið sendi frá sér rétt í þessu í kjölfar þess að myndband af Eiði Smára pissa á almannafæri í miðbænum fór í dreifingu í síðustu viku

Í tilkynningunni segir:

„Vegna umfjöllunar um Eið Smára Guðjohnsen vill KSÍ koma því á framfæri að málefni hans hafa verið í viðeigandi farvegi hjá KSÍ.   

Eiður Smári hefur fengið skriflega áminningu í tengslum við starfsskyldur sínar hjá KSÍ og fer nú í tímabundið leyfi frá störfum, en mun snúa aftur af fullum krafti með landsliðinu í verkefnum haustsins. KSÍ lýsir yfir stuðningi við Eið Smára og hans ákvörðun um að leita sér hjálpar og óskar honum alls hins besta.“

Þá eru jafnframt skilaboð frá Eiði sjálfum í tilkynningunni:

„Ábyrgðin liggur hjá mér.

Ég hef alla tíð reynt af bestu getu að uppfylla það að vera fyrirmynd.

Það hlutverk kom til mín og fylgdi sennilega velgengni minni á knattspyrnuvellinum.

Það að vera fyrirmynd þýðir ekki að ég sé fullkominn, ég er mannlegur.  Stundum tökum við rangar ákvarðanir, sýnum af okkur dómgreindarleysi og gerum mistök, og þá sérstaklega þegar áfengi spilar inn í.  Á lífsleið okkar þurfum við öll að taka á ýmsum persónulegum málum, og ég mun svo sannarlega taka á mínum.

Alltaf einn af ykkur,  Eiður Smári.“