Athugið þessi frétt er meira en 1 mánaða gömul.

Guðni: Ég varð fyrir vonbrigðum

Mynd: RÚV / Skjáskot
Guðni Th. Jóhannesson forseti Íslands segist hafa orðið fyrir vonbrigðum með að ekki hafi náðst efnisleg umræða á þingi um breytingar á stjórnarskránni. Hann segir að stjórnarskráin hafi ekki verið meitluð í stein þegar hún var samin.

Frumvarp Katrínar Jakobsdóttur forsætisráðherra um breytingar á stjórnarskránni fékk ekki afgreiðslu á þingi sem frestað var í gær, það hafði verið til umfjöllunar í stjórnskipunar- og eftirlitsnefnd Alþingis í rúma fjóra mánuði og var umdeilt frá upphafi.

Guðni hefur við ýmis tækifæri gert stjórnarskrárbreytingar að umtalsefni, meðal annars í ræðu sem hann hélt við setningu Alþingis síðastliðið haust en þar skoraði hann á þingmenn að taka nýja stjórnarskrá til umfjöllunar.

„Það eru ýmsar breytingar sem eru þess eðlis að um þær verður alltaf ágreiningur. En maður skyldi ætla að um aðrar þeirra ætti einhvern tímann að nást samstaða, þá væri að mínu mati tímabært að taka til athugunar að breyta ákvæði sem er á þá lund að forseti geti veitt undanþágu frá lögum eins og gert hefur verið hingað til,“ segir Guðni.  „Stjórnarskráin var ekki meitluð í stein á stríðsárunum og við upphaf lýðveldisstofnunar.“

Varðstu fyrir vonbrigðum? „Eins og fleiri þá varð ég fyrir vonbrigðum já.
Með að þessar breytingar hafi ekki orðið að lögum? Ég tjái mig ekki um breytingarnar í sjálfu sér. En að þingið hafi ekki náð að eiga efnislega umræðu um tillögur að breytingu á stjórnarskrá. Það finnst mér áhyggjuefni.“