Athugið þessi frétt er meira en 1 mánaða gömul.

Handsömuðu innbrotsþjóf og biðu eftir lögreglu

Mynd með færslu
 Mynd: Eggert Þór Jónsson - RÚV
Manni sem reyndi að brjótast inn í hús í Árbænum í Reykjavík upp úr miðnætti varð ekki kápan úr því klæðinu. Það sást til mannsins og var innbrotstilraunin tilkynnt til lögreglu. Þegar lögreglan kom á staðinn var innbrotsþjófurinn enn á staðnum, í haldi þess sem tilkynnti um innbrotið og annars manns. Þeir höfðu handsamað manninn við innbrotið og biðu eftir komu lögreglu. Innbrotsþjófurinn gisti fangaklefa í nótt.

Fjórir ökumenn voru stöðvaðir í gærkvöld og í nótt grunaðir um akstur undir áhrifum áfengis eða fíkniefna. Fimmti bílstjórinn sem grunaður er um akstur undir áhrifum lenti í umferðaróhappi. Sá var vistaður í fangaklefa.

Mikið var að gera í sjúkraflutningum hjá Slökkviliði höfuðborgarsvæðisins síðasta sólarhringinn. Alls þurftu sjúkraflutningamenn að fara í 130 sjúkraflutninga, þar af ellefu vegna COVID.

Brynjólfur Þór Guðmundsson
Fréttastofa RÚV