Athugið þessi frétt er meira en 1 mánaða gömul.

Átta skipasmíðastöðvar vilja smíða nýtt rannsóknaskip

Mynd með færslu
 Mynd: RÚV
Átta skipasmíðastöðvar vilja bjóða í smíði nýs rannsóknaskips fyrir Hafrannsóknastofnun. Þetta varð ljóst þegar forútboð í smíðina var opnað hjá Ríkiskaupum.

Skipið kemur í stað rannsóknaskipsins Bjarna Sæmundssonar RE og er áformað að semja um smíði þess fyrir 1. nóvember. Smíðatíminn er áætlaður tvö ár og því gert ráð fyrir að nýtt skip komi til landsins síðla árs 2023.

Í tilkynningu á vef Stjórnarráðsins segir að gert sé ráð fyrir svokölluðu samkeppnisútboði. „Sem gefur möguleika á viðræðum við boðendur og aðlögun vegna tilboða. Samhliða því að unnið er að hæfnismati á skipasmíðastöðvunum. Þegar þeirri vinnu verður lokið mun útboð um smíði skipsins fara fram og þær stöðvar sem standast hæfnismat fá að taka þátt í því útboði.“

Áætlað er að hefja útboðsferli 1. júní með útsendingu útboðsgagna og að útboð verði opnuð tveimur mánuðum síðar. Að því loknu verða tilboðin metið og gengið til samninga og er áætlað að það taki tvo til þrjá mánuði.

Við hönnun á nýju rannsóknaskipi hefur verið horft til ýmissa leiða til að draga úr notkun jarðefnaeldsneytis. Hægt verður að brenna lífdísil (t.d. repjuolíu) og til skoðunar er að um borð verði pláss fyrir viðeigandi búnað ef hentugar vélar til brennslu metanóls verða komnar í framleiðslu á smíðatímanum.

„Innan skips verður leitað allra leiða til að spara orku. Til lýsingar er notuð LED tækni, spilbúnaður skipsins verður rafdrifinn, til upphitunar verður notuð afgangsorka frá kælivatni aðalvéla og vistarverum skipt upp þannig að einungis verði loftræstar þær sem eru í notkun hverju sinni. Skipið verður við landrafmagn og gert er ráð fyrir að settir verði upp varmaskiptar í heimahöfn skipsins þannig að skipið verði hitað upp með vatni frá hitaveitu.“