Athugið þessi frétt er meira en 1 mánaða gömul.

50 mega nú koma saman

Mynd með færslu
Íslenskutími hjá 8. bekk í Hrafnagilsskóla Mynd: RÚV - Ágúst Ólafsson
Tilslakanir á sóttvarnarreglum tóku gildi á miðnætti. Fjöldatakmarkanir fara úr 20 í 50 manns, sund- og baðstaðir og líkamsræktarstöðvar mega taka á móti 75% af leyfilegum hámarksfjölda gesta, hámarksfjöldi þátttakenda í íþróttum og sviðslistum verður 75 í hverju hólfi eða á sviði og hámarksfjöldi gesta á sitjandi viðburðum fer úr 100 í 150 manns. Þá verður opnunartími veitingastaða lengdur um klukkustund. Einnig verða ýmsar tilslakanir gerðar á skólastarfi.

Nándarregla verður áfram almennt tveir metrar og grímuskylda er óbreytt. Í verslunum verður hámarksfjöldi nú 200 manns í stað 100 og veitingastaðir mega vera opnir til klukkan 22 á kvöldin, og þurfa gestir að hafa yfirgefið þá fyrir klukkan 23:00.

Í skólastarfi verður hámarksfjöldi fullorðinna í hverju rými 50, en hámarksfjöldi barna verður 100 í hverju rými. Foreldrar og aðstandendur mega nú koma aftur inn í skólana. Þá verður blöndun milli hópa barna innan skóla nú heimil í sundi og íþróttum í grunnskóla.

Tilslakanirnar ná ekki til Skagafjarðar og Akrahrepps vegna hópsýkingar sem kom þar upp á föstudag. Sjö smit hafa nú greinst í sveitarfélögunum og gripið til harðra sóttvarnaaðgerða. Skólum og leikskólum hefur verið lokað, íþróttamiðstöðvar eru lokaðar og lokað á æfingar barna.