Mynd: Pexels
Athugið þessi frétt er meira en 1 mánaða gömul.
Netglæpamenn starfi á kvöldin en ekki netöryggissveit
Farið er hörðum orðum um netöryggissveit Póst- og fjarskiptastofnunar í umsögn Sýnar hf. um nýtt frumvarp sem felur í sér heildarendurskoðun á lögum um stofnunina. Nafni hennar á að breyta í Fjarskiptastofu. Í umsögninni segir að starfsemi netöryggissveitarinnar hafi valdið vonbrigðum en þó hafi rekstrargjald fjarskiptafyrirtækjanna til hennar verið hækkað og framlög til málaflokksins stóraukin. Sveitin starfi hvorki á kvöldin né um helgar - ólíkt netglæpamönnum.
„Upphaflega voru þar tveir starfsmenn, en munu nú vera sex og áformað er að þeir verði innan skamms orðnir fimmtán. Fjölgunin hefur ekki leitt til bættrar þjónustu sveitarinnar,“ segir í umsögninni. Fjarskiptafyrirtæki hafi haft mjög takmörkuð not af þjónustu sveitarinnar. Þetta skýrist m.a. af stuttum opnunartíma hennar, hann sé til kl. 16 á virkum dögum og lokað sé um helgar.
„Netglæpamenn vinna hins vegar bæði á kvöldin og um helgar, sem og öryggisstjórar fjarskiptafyrirtækjanna,“ segir jafnframt í umsögninni.
Sýn vill að rekstrargjald til netöryggissveitar verði lækkað úr 0,38% af bókfærðri veltu í 0,3% líkt og það var fyrir nokkrum árum. Tekið er í sama streng í umsögn Símans með frumvarpinu.
Í umsögn Símans er tími núverandi forstjóra í starfinu einnig gerður að umtalsefni. Samkvæmt frumvarpinu geti sami maður verið forstjóri Fjarskiptastofu „um ókomna tíð,“ segir í umsögn Símans. Þá er bent á að núverandi forstjóri Póst- og fjarskiptastofnunar hafi gegnt stöðunni í tæplega tvo áratugi. Þetta telur Síminn ekki eðlilegt og leggur til að sami háttur verði hafður á og gildir um Samkeppniseftirlitið en skipta verður um forstjóra þar á að minnsta kosti tíu ára fresti.
Míla hf. fer einnig fram á lækkun rekstrargjalds. Þá segir í umsögn Mílu að Póst- og fjarskiptastofnun eigi að gera greiningu á fjarskiptamarkaðnum ekki sjaldnar en á þriggja ára fresti en 7 ár hafi liði milli greininga.
Nánar má lesa um frumvarpið og umsagnir um það á vef Alþingis.
