Karlarnir hafa lokið keppni á EM

Mynd með færslu
 Mynd: Mummi Lú - RÚV

Karlarnir hafa lokið keppni á EM

22.04.2021 - 20:26
Karlalandsliðið í áhaldafimleikum hefur lokið keppni á Evrópumótinu. Tveir keppendur luku fjölþraut en Valgarð Reinhardsson meiddist á fyrsta áhaldi.

Íslandsmeistarinn Valgarð Reinhardsson er úr leik á Evrópumótinu í áhaldafimleikum. Valgarð hóf keppni á stökki en meiddist á ökkla í seinna stökkinu og gat ekki haldið áfram keppni.

Þeir Martin Bjarni Guðmundsson og Jónas Ingi Þórisson voru báðir að keppa á sínu fyrsta Evrópumóti í fullorðinsflokki og kláruðu sína fjölþraut með ágætis árangri. Martin Bjarni með 71,064 stig í 61. sæti og Jónas Ingi með 69,831 stig í 63. sæti af 152 keppendum.

Jón Sigurður Gunnarsson keppti í hringjum og hlaut hann 13,000 stig fyrir sínar æfingar í 49. sæti af 96 keppendum, en 8 efstu menn komast áfram í úrslit á hverju áhaldi.