Athugið þessi frétt er meira en 1 mánaða gömul.

Tveimur veitingastöðum lokað á Akureyri

Mynd með færslu
 Mynd: Óðinn Svan Óðinsson - RÚV
Lögreglan á Norðurlandi eystra lokaði í gærkvöld tveimur veitingahúsum á Akureyri. Öðru þeirra var lokað vegna útrunnins rekstrarleyfis og hinu var lokað vegna brots á sóttvarnarlögum.

Samkvæmt núgildandi reglum verða gestir veitingastaða að yfirgefa staðinn í síðasta lagi klukkan 23:00. Á Facebooksíðu Lögreglunnar á Norðurlandi eystra segir að enn hafi verið að þjóna til borðs um klukkan 23:15 og um 50 viðskiptavinir inni á veitingastaðnum.

Þá segir lögreglan að nokkuð af fólki hafi verið í bænum og hún hafi sinnt ölvunar- og hávaðaútköllum fram undir morgun.

Lögreglan greinir einnig frá því að gafl hafi fokið af stóru verksmiðjuhúsnæði á Siglufirði. Þar gekk á með talsverðum vindhviðum í gærkvöld. Lögreglan aðstoðaði björgunarsveit við að festa gaflinn aftur niður.

Róbert Jóhannsson
Fréttastofa RÚV