Athugið þessi frétt er meira en 2 mánaða gömul.

Dómsmálaráðherra boðar aðgerðir gegn glæpahópum

Mynd með færslu
 Mynd: RÚV
Að mati lögreglu starfa 15 skipulagðir glæpahópar hér á landi, í þeim er fólk af mörgu þjóðerni, þeir starfa bæði innan- og utanlands og margir þeirra stunda löglegan rekstur samhliða brotastarfsemi sinni. Þetta kemur fram í aðsendri grein Áslaugar Örnu Sigurbjörnsdóttur dómsmálaráðherra í Morgunblaðinu í dag.

Í greininni boðar ráðherra frekari aðgerðir til að bregðast við þessu, meðal annars sérstakt 350 milljóna króna framlag í löggæslusjóð til að efla lögregluna í aðgerðum gegn skipulagðri brotastarfsemi.

Áslaug Arna segir í grein sinni að nauðsynlegt sé að auka skilvirkni á þessu sviði. „Íslenska lögreglan þarf að hafa getu og þekkingu til að takast á við umfangsmikil, flókin og þaulskipulögð mál,“ segir í greininni. Þar segir að sérstakur stýrihópur hafi síðustu mánuði unnið að því að samhæfa aðgerðir, auka samstarf á milli lögregluembætta, auka alþjóðlega samvinnu og gagnkvæmt samstarf við önnur stjórnvöld og stofnanir. 

„Brýnt er að íslenska lögreglan - og í raun íslenska réttarkerfið - hafi burði, getu og þekkingu til að takast á við þau flóknu verkefni sem við blasa í harðnandi heimi skipulagðrar glæpastarfsemi,“ segir Áslaug Arna í grein sinni.