Biðraðir eftir COVID-sýnatöku heyra vonandi sögunni til Mynd: RÚV - Ljósmynd
Rýmri reglur á morgun eftir 15 daga án smits í febrúar
Ekkert barn er með COVID-19. Aðeins er einn á sjötugsaldri og einn á sextugsaldri með virkt smit. Af þeim 17 sem eru í einangrun eru 9 á aldrinum 18 til 29 ára og í febrúarmánuði hafa 15 dagar verið smitlausir. Enda mega 50 koma saman á morgun, áhorfendur fá loks að mæta á kappleiki en þeir sem svíkjast um á landamærunum eiga yfir höfði sér 100 þúsund króna sekt.
Staðan á Íslandi er mjög frábrugðin því sem gengur og gerist í nágrannalöndunum. Í löndum eins og Svíþjóð og Þýskalandi virðist faraldurinn aftur vera að færast í vöxt.
Í gær greindist ekkert smit hér innanlands , annan daginn í röð. Aðeins einn hefur greinst utan sóttkvíar í febrúar, sex smit hafa verið í sóttkví og 15 dagar hafa verið án smits.
17 eru í einangrun og 12 þeirra eru búsettir á höfuðborgarsvæðinu. Fjórir landshlutar eru án smits og í sex landshlutum af átta er enginn í sóttkví.
Ekkert barn er nú í einangrun og því er kannski við hæfi að á morgun taka gildi nýjur reglur um skólahald.
Þar gefst nemum í háskóla færi á að hefja staðnám að nýju, tveggja metra reglan er afnumin og í staðinn tekinn upp 1 metra regla. Hámarksfjöldi í framhalds-og háskólum hækkar í 150. „„Þessar breytingar gera ótrúlega mikið fyrir félagslíf skólans. Þetta þýðir að við getum haldið litla viðburði í skólanum fyrir nemendur í skólanum. Ég sé fram á bjarta tíma,“ sagði formaður nemendafélags FG í kvöldfréttum RÚV.
Í grunnskólum er nemendur undanþegnir nálægðartakmörkunum og grímuskyldu. Ekki eiga þó fleiri en 150 nemendur að vera í hverju rými innan dyra.
Nýgengi smita innanlands er nú 1,4 sem er álíka hátt og það var þegar allt lék í lyndi í sumar og fólk ferðaðist innanlands. Enda taka nýjar reglur um samkomutakmarkanir gildi á morgun. Fjöldatakmörk fara úr 20 í 50, áhorfendur eru leyfðir á kappleikjum, og kráreigendur geta lokað klukkan 23.
Eins og við var búist er þó áfram haldið í tveggja metra regluna og grímuskyldu. Sóttvarnalæknir segir enda í minnisblaði sínu til heilbrigðisráðherra að ekki sé hægt að fullyrða að landið sé „veirufrítt“ og því sé mikilvægt að viðhafa áfram varkárni í sóttvörnum.
En það er fleira sem gerist á morgun því þá geta farþegar á leið til landsins átt von á sekt ef þeir standa ekki sína plikt. Þeir sem framvísa ekki neikvæðu COVID-prófi sem er yngra en 72 stundir eiga yfir höfði sér 100 þúsund króna sekt og þeir sem fara ekki í skimun á landamærunum fá sömu sekt.
Sóttvarnalæknir hefur sagt að hættan á nýjum faraldri komi að utan. Ein af forsendum þess að hægt sé að slaka á aðgerðum innanlands sé að koma í veg fyrir að smit „leki“ í gegnum landamærin.
