Athugið þessi frétt er meira en 1 mánaða gömul.

Andlátið í Sundhöllinni skilgreint sem vinnuslys

Mynd með færslu
 Mynd:
Andlát karlmanns sem lést í Sundhöll Reykjavíkur á fimmtudaginn er skilgreint sem vinnuslys. Þetta segir Jóhann Karl Þórisson, yfirlögregluþjónn á höfuðborgarsvæðinu. 

Jóhann Karl segir að beðið sé niðurstöðu úr krufningu, en hennar sé að vænta næstu daga. Enginn sé með réttarstöðu sakbornings í málinu.

Maðurinn starfaði í geðþjónustu og var með geðfötluðum skjólstæðingi sínum í sundlauginni þegar hann lést. Hann fannst á botni laugarinnar.

„Þetta er skilgreint sem vinnuslys, þar sem maðurinn var að störfum þegar hann lést og færðist því frá miðlægri rannsóknardeild til okkar. Við fengum gögnin frá deildinni núna í morgun og erum að fara yfir þau,“ segir Jóhann Karl sem segist ekki geta gefið meiri upplýsingar um málið á þessari stundu. 

Spurður hvort talið sé að öryggiseftirliti hafi verið ábótavant í sundlauginni segir hann ekki hægt að fullyrða neitt um það. Verið sé að skoða upptökur úr myndavélum sundlaugarinnar, vonast sé til þess að þær geti gefið vísbendingar um andlát mannsins.

 

annalth's picture
Anna Lilja Þórisdóttir