Athugið þessi frétt er meira en 1 mánaða gömul.

Mótmæli í Kaupmannahöfn þróuðust út í óspektir

24.01.2021 - 00:19
Mótmæli Men in black gegn sóttvarnaráðstöunum stjórnvalda í Danmörku, 23.01. 2021
 Mynd: M.C.Rasmussen - Danmarks Radio
Óformleg hreyfing manna sem kalla sig Men in Black blés til mótmæla gegn sóttvarnaaðgerðum danskra stjórnvalda í Kaupmannahöfn í kvöld, öðru sinni, og heimtuðu „Frelsi fyrir Danmörku“. Mótmælin hófust klukkan 18 að staðartíma og voru að mestu friðsamleg til að byrja með, segir í frétti Danmarks Radio, en það átti eftir að breytast.

Mótmælin í kvöld voru líka öllu fjölmennari en samskonar samkoma fyrir tveimur vikum. Danska blaðið BT áætlar að um 1.000 manns hafi safnast saman á Ráðhústorginu að þessu sinni en aðeins tvö til þrjú hundruð manns hlýddu kallinu fyrir hálfum mánuði.

Hitnaði í kolunum með kvöldinu

Er líða tók á kvöldið fór heldur að hitna í kolunum, segir í frétt DR. Lögreglan hafði margoft skipað fólki að dreifa sér og halda til síns heima en talaði fyrir daufum eyrum. Þegar hún að lokum tók til við að leysa mótmælin upp brást hluti mótmælenda illa við og svaraði með því að grýta laganna verði með ýmsu lauslegu sem hendi var næst.

Þá var stór brúða, sem átti að fyrirstilla Mette Frederiksen, forsætisráðherra, hengd upp og brennd. Á brúðunni var pappaskilti með textanum „Hun må og skal aflives“ eða Það verður að taka hana af lífi og það verður gert. Um klukkan ellefu í kvöld, að dönskum tíma, voru flestir eða allir mótmælendur horfnir úr miðborginni og allt með kyrrum kjörum á ný. 
 

Ævar Örn Jósepsson
Fréttastofa RÚV