Athugið þessi frétt er meira en 2 mánaða gömul.

Jarðhæðir Gimlis og Háskólatorgs ónothæfar næstu mánuði

Mynd með færslu
 Mynd: RÚV
Jarðhæð í Gimli verður ónothæf næstu mánuði og eins fyrirlestrasalir á jarðhæð á Háskólatorgi. Öll kennsla sem ella hefði verið þar færist nú á netið. Verulegt tjón varð í allmörgum byggingum Háskóla Íslands vegna vatnslekans í fyrrinótt að því er fram kemur í tilkynningu Jóns Atla Benediktssonar rektors.

Öll kennsla sem ella hefði verið þar færist nú á netið en Jón Atli segir allt kapp lagt á að röskun á starfi skólans verði þó sem minnst. Slökkvilið höfuðborgarsvæðisins vann að hreinsun í byggingum Háskólans fram yfir miðjan dag í gær. 

Nú er leitað hentugs húsnæðis fyrir skrifstofu Félagsvísindasviðs sem hefur aðsetur í Gimli og eins er þörf á rými til að koma í stað þeirra kennslustofa sem ónothæf eru vegna vatnstjónsins.

Veitingasalan Háma á Háskólatorgi og bóksalan voru lokuð í gær en verða opnuð að nýju í dag, þjónustuborð á torginu er opið og Stúdentakjallarinn verður opnaður á morgun.

„Mér er efst í huga þakklæti til þeirra fjölmörgu, starfsfólks okkar og slökkviliðs, sem lögðu afar hart að sér í nótt við erfiðar aðstæður við að draga úr tjóni eins og unnt var,“ segir í tilkynningu Jóns Atla Benediktssonar rektors Háskóla Íslands.