Athugið þessi frétt er meira en 1 mánaða gömul.

Ólafur: „Þá ættum við að geta strítt Frökkunum“

Mynd: EPA / EPA

Ólafur: „Þá ættum við að geta strítt Frökkunum“

21.01.2021 - 20:33
„Þetta var rosalega súrt tap í gær og það var erfitt að kyngja þessu,“ segir Ólafur Guðmundsson, landsliðsmaður í handbolta, um tapið á móti Sviss í milliriðli í Egyptalandi í gær. „En þetta er stórmót og það er leikur bara strax á morgun þannig að við þurfum að setjast strax aftur upp á hestinn,“ segir Ólafur jafnframt en Ísland og Frakkland eigast við klukkan 17 á morgun.

„Frakkarnir eru náttúrulega bara með topplið og leikmenn þeirra í öllum stöðum að spila í toppklúbbum. Þetta verður krefjandi og skemmtilegt verkefni fyrir okkur,“ segir Ólafur sem er næstmarkahæsti leikmaður Íslands á HM með 18 mörk í fjórum leikjum. Þá hefur Ólafur einnig verið einn af lykilmönnum Íslands í varnarleiknum. 

„Við munum klárlega taka þennan flotta varnarleik úr Svissleiknum með okkur. Við hefðum reyndar viljað nokkur hraðaupphlaup ofan á þennan fína varnarleik. Ef við náum að bæta því við á morgun getum við strítt Frökkunum,“ segir Ólafur.

Leikur Íslands og Frakklands hefst klukkan 17 á morgun en HM-stofan er á dagskrá RÚV 16:30.