Athugið þessi frétt er meira en 3 mánaða gömul.

Líklega hundraða milljóna tjón í Háskóla Íslands

Mynd: RÚV / RÚV
Kristinn Jóhannesson, sviðsstjóri framkvæmda- og tæknisviðs Háskóla Íslands, segir að enn sé of snemmt að segja til um hversu mikið tjón hlaust í Háskóla Íslands af völdum vatnsflaums þegar kaldavatnslögn fór í sundur í nótt. „Við höfum bara hugmyndir um að það hlaupi á hundruðum milljóna. Það er gríðarlegt tjón.“ Hann telur að munir á Árnastofnun hafi sloppið. Listasafn er í sumum húsum en eftir á að skoða hvort það lenti í vatninu.

„Það er ennþá myrkur. Það er rafmagnslaust í Gimli. Þar flæddi vatnið svo hátt í kjallaranum að það fór upp á rafmagnstöflu og sló öllu út. Mesta tjónið er á Háskólatorgi og í Gimli. Vatn flæddi hér um allt í stríðum straumum. Þegar fer að birta sjáum við hvernig skemmdir hafa orðið á umhverfinu hér í kring,“ sagði Kristinn í fréttum útvarps klukkan níu. „Við erum ekki alveg komin með það á hreint hvort að einhver menningarleg verðmæti hafi skemmst. Við erum með listasafn í þessum húsum og svo er Árnastofnun í Árnagarði en við höldum að það hafi sloppið.“

Sigríður Hagalín Björnsdóttir fréttamaður sagði að það væri skelfilegt umlits í Háskólatorgi þar sem hún var þá stödd. Þar var allt á floti. „Fínu rauðu gólfteppin eru eins mýrarfen, getum við sagt. Það er augljóst að það hefur orðið mikið tjón hérna.“

Mynd: Sigríður Hagalín Björnsdótt / Sigríður Hagalín Björnsdótt