Tónlistarkonan Emilíana Torrini hefur sent frá sér í samvinnu við Markétu Irglová og Þjóðleikhúsið titillag leikritsins Vertu úlfur. Lagið fjallar um hinar dekkri og viðkvæmari hliðar geðhvarfa, en sýningin er byggð á nýlegri sjálfsævisögulegri frásögn Héðins Unnsteinssonar Vertu úlfur!
Í lok janúar sendir sveitin Funk Harmony Park frá sér þröngskífu sem inniheldur meðal annar lagið Myrkrið. Sveitin hefur verið nokkuð iðin við útgáfu á streymisveitum á síðust mánuðum auk þess að vera í samstarfi við raftónlistarútgáfuna Móatún.
Einar og Abbey hafa sent frá sér lagið Without You á Möller Records í endurhljóðblöndun Tonik Ensamble. Lagið er að sögn flytjenda eitt af þessum lögum sem komu hratt og örugglega til höfunda, samið án nokkurra vandræða á huggulegu laugardagskvöldi.
Tónlistarmaðurinn Teitur Magnússon hefur sent frá sér þriðja lagið af væntanlegri breiðskífu sinni sem kemur út á árinu. Lag Teits heitir Líft í mars? og er að sögn Teits óður til glam-rokksins þar sem hann veltir fyrir sér líðandi stund, hlakkar til hækkandi sólar og vonast eftir betri tíð.
Sweetest Heart er fjórða lagið sem Arianna Ferro gefur út og það þriðja í samstarfi við Arnar Guðjónsson. Arianna varð móðir 19 ára gömul og lagið segir frá reynslu hennar af móðurhlutverkinu en Ariönnu til halds og trausts er átta ára dóttir hennar sem syngur með henni.
Hljómsveitin Konsulat sem hefur verið öflugt í útgáfu síðustu ár hefur sent frá sér breiðskífuna No. 7. Tríóið er skipað þeim Kolbeini Soffíusyni, Þórði Grímssyni og Arnljóti Sigurðssyni og þeir spila tilraunakennda raftónlist.
