Athugið þessi frétt er meira en 1 mánaða gömul.

Stuðningsmenn forsetans vilja náðun

epaselect epa08923457 Supporters of US President Donald J. Trump stand by the door to the Senate chambers after they breached the US Capitol security in Washington, DC, USA, 06 January 2021. Protesters stormed the US Capitol where the Electoral College vote certification for President-elect Joe Biden took place.  EPA-EFE/JIM LO SCALZO
 Mynd: Jim Lo Scalzo - EPA
Stuðningsmenn Donald Trump sem segjast hafa ruðst inn í þinghúsið í byrjun mánaðarins að hans beiðni vonast eftir náðun frá forsetanum. Meðal þeirra er fasteignasalinn Jenna Ryan frá Texas, sem segist ekki eiga skilið fangelsisvist þar sem hún hafi aðeins verið að sýna föðurlandsást sína og hlýða kalli forsetans um að fara í þinghúsið.

Ryan skildi eftir sig talsvert af upplýsingum áður en hún æddi inn í þinghúsið ásamt æstum múg. Samkvæmt dómsskjölum birti hún mynd af sér á samfélagsmiðlum um borð í einkaþotu á leiðinni til Washingtonborgar daginn fyrir óeirðirnar. Þá voru myndir af henni á tröppum þinghússins og við glugga með brotinni rúðu eftir múginn. Í myndbandi á Facebook greinir hún frá því að hún ætli að arka inn í þinghúsið. Í beinni útsendingu á Facebook bætti hún því við að hópurinn ætlaði að æða inn í þinghúsið hvað sem það kostaði. Hún notaði svo tækifærið á leiðinni upp tröppurnar til að auglýsa fasteignasölu sína. Eftir óeirðirnar í þinghúsinu skrifaði hún á Twitter að þetta hafi verið með betri dögum í lífi hennar.

Verjandi annars stuðningsmanns forsetans krefst einnig náðunar fyrir hans hönd. Þann stuðningsmann þekkja eflaust margir af myndum þar sem hann klæddist fáu öðru en vísundaskinni og -hornum. Verjandi hans, Albert Watkins, segir að Trump eigi að sýna virðingu og náða þá sem voru friðsamir í þinghúsinu, þar sem þeir voru í boði forsetans. Watkins bætir því við að skjólstæðingur hans sé ekki á sakaskrá, og stundi jóga reglulega. Eins minnist hann á mataræði mannsins, en hann hafnaði matnum sem honum var boðið í gæsluvarðhaldi þar sem hann var ekki lífrænt ræktaður. Maðurinn á yfir höfði sér sex ákæruatriði og á ekki möguleika á lausn gegn tryggingu.