Ísland leikur í F-riðli mótsins og er fyrirfram talið með sterkasta liðið í þeim riðli ásamt Portúgal. Þar að auki eru Alsír og Marokkó í riðli Íslands en þrjú efstu liðin fara áfram í milliriðil.

Alsír hefur keppt reglulega á heimsmeistaramótum síðustu áratugina en ekki komist upp úr riðlinum frá árinu 2001. Marokkó mætir aftur til leiks á HM eftir fjórtán ára fjarveru en liðið hefur aldrei komist upp úr riðli sínum. Portúgal hefur best náð 12. sæti á heimavelli 2003 en það er líka síðasta heimsmeistaramót sem Portúgalar kepptu á. Portúgalar hafa hins vegar tekið miklum framförum síðustu ár og náðu til að mynda 6. sæti á EM 2020. 

F-riðillinn á HM:

Ísland er á meðal þátttökuþjóða í 21. sinn en Íslendingar voru fyrst með í Austur-Þýskalandi 1958. Þá varð niðurstaðan 10. sæti af 16 liðum en besti árangur Íslands náðist í Kumamoto á HM í Japan 1997 þegar íslenska liðið varð í 5. sæti. 

Á HM í Egyptalandi taka lið stig með sér í milliriðla úr viðureignum gegn öðrum liðum sem fara einnig í milliriðla úr sama riðli. Líklegt verður að teljast að Ísland hafi sigur gegn Alsír og Marokkó sem gerir leikinn gegn Portúgal í kvöld afar mikilvægan. 

Leikir Íslands í F-riðli á HM:

• Í kvöld klukkan 19:30: Ísland - Portúgal
• Laugardaginn 16. janúar klukkan 19:30: Ísland - Alsír
• Mánudaginn 18. janúar klukkan 19:30: Ísland - Marokkó

Ísland keppir nú á sínu fimmta heimsmeistaramóti í röð en íslenska liðið náði ekki að tryggja sér þátttökurétt á HM í Króatíu 2009. Aðeins einu sinni hefur Ísland verið á meðal tíu efstu á HM frá 2011. 

Árangur Íslands á síðustu fimm heimsmeistaramótum:

Aron Pálmarsson, leikmaður Barcelona, þurfti að draga sig úr hópnum í aðdraganda HM vegna meiðsla. Þá hætti markahæsti landsliðsmaður handboltasögunnar, Guðjón Valur Sigurðsson, eftir EM á síðasta ári. Ísland verður því án tveggja leikmanna sem hafa verið burðarásar síðustu ár. 

Hópur Íslands á HM:

Markmenn:

• Ágúst Elí Björgvinsson, KIF Kolding, 33 landsleikir
• Björgvin Páll Gústavsson, Haukum, 231 landsleikur
• Viktor Gísli Hallgrímsson, GOG, 19 landsleikir

Vinstri hornamenn:

• Bjarki Már Elísson, Lemgo, 73 landsleikir
• Oddur Gretarsson, Balingen-Weilstetten, 20 landsleikir

Vinstri skyttur:

• Elvar Örn Jónsson, Skjern, 37 landsleikir
• Ólafur Andrés Guðmundsson, IFK Kristianstad, 125 landsleikir

Miðjumenn:

• Gísli Þorgeir Kristjánsson, Magdeburg, 26 landsleikir
• Janus Daði Smárason, Göppingen, 48 landsleikir
• Magnús Óli Magnússon, Val, 6 landsleikir

Hægri skyttur:

• Alexander Petersson, Rhein-Neckar Löwen, 182 landsleikir
• Ómar Ingi Magnússon, Magdeburg, 49 landsleikir
• Kristján Örn Kristjánsson, PAUC-Aix, 8 landsleikir
• Viggó Kristjánsson, Stuttgart, 13 landsleikir

Hægri hornamenn:

• Arnór Þór Gunnarsson, fyrirliði, Bergischer HCC, 116 landsleikir
• Sigvaldi Björn Guðjónsson, Vive Kielce, 30 landsleikir

Línumenn/varnarmenn:

• Arnar Freyr Arnarsson, MT Melsungen, 54 landsleikir
• Elliði Snær Viðarsson, Gummersbach, 7 landsleikir
• Kári Kristján Kristjánsson, ÍBV, 146 landsleikir
• Ýmir Örn Gíslason, Rhein-Neckar Löwen, 44 landsleikir

Aðeins mega 16 leikmenn vera á skýrslu í hverjum leik. Gegn Portúgal í kvöld er leikjahæsti leikmaður hópsins, Björgvin Páll Gústavsson, utan hóps auk Kristjáns Arnar Kristjánssonar, Magnúsar Óla Magnússonar og Kára Kristjáns Kristjánssonar sem hvíla einnig í kvöld. 

RÚV er með teymi í Egyptalandi en Einar Örn Jónsson, íþróttafréttamaður og fyrrverandi landsliðsmaður í handbolta, lýsir öllum leikjum Íslands beint í sjónvarpi. Þá eru leikjum Íslands jafnframt lýst á Rás 2. 

Kristjana Arnarsdóttir stýrir svo HM-stofunni á RÚV en sérfræðingar þar verða Logi Geirsson og Arnar Pétursson. 

Hér má sjá allar beinar útsendingar sem fram undan eru á RÚV og RÚV 2.