Athugið þessi frétt er meira en 3 mánaða gömul.

Slaka á sóttvarnaraðgerðum um jólin

05.12.2020 - 17:44
epa08864257 Portuguese Prime Minister Antonio Costa during the announcement of new restrictive measures for the Christmas season in the fight against the Covid-19 pandemic in the country, in Lisbon, Portugal, 05 December 2020.  EPA-EFE/TIAGO PETINGA
Antonio Costa forsætisráðherra Portúgals. Mynd: EPA-EFE - LUSA
Yfirvöld í Portúgal hafa tilkynnt um tímabundnar afléttingar sóttvarnaraðgerða vegna COVID-19 yfir jólahátíðina svo fólk geti heimsótt ástvini. Aftur verður hert á aðgerðum eftir jól til að koma í veg fyrir fjölmennan gleðskap um áramótin.

Banni á ferðalögum innanlands verður aflétt milli 23. og 26. desember. Engu að síður hvetur Antonio Costa forsætisráðherra fólk til að forðast stórar samkomur án þess að bera grímu. Hann segir nú nauðsynlegt sem aldrei fyrr að jólin fari fram með sem eðlilegustum hætti en fólk þurfi að fara varlega svo faraldurinn nái ekki flugi á ný. Það viti af smithættunni sem fylgi fjölskyldusamkomum en nauðsynlegt sé að treysta dómgreind þess.

Engar samkomutakmarkanir verða yfir jólin og útgöngubann gildir frá tvö um nóttina en ekki ellefu um kvöld líkt og nú er þann 24. og 25. desember. Á gamlárskvöld verða fögnuðir á götum útum bannaðir og sex manna samkomutakmarkanir utandyra. Fólk má hittast á heimilum eins lengi og það heldur sig innan síns sveitarfélags og er komið heim fyrir klukkan tvö að nóttu.

Fyrsta bylgja COVID-19 sem skall á Portúgal var fremur mild miðað við önnur ríki í suðurhluta Evrópu líkt og Spán og Ítalíu. Tæplega 320 þúsund manns hafa greinst með COVID-19 í Portúgal og tæplega fimm þúsund látist af þeim sökum. Íbúafjöldi þar er rétt rúmar tíu milljónir.

thorvardurp's picture
Þorvarður Pálsson
Fréttastofa RÚV