Athugið þessi frétt er meira en mánaðargömul.

Hitaveitan á Hornafirði gangsett fyrir áramót

30.11.2020 - 13:55
Mynd með færslu
 Mynd: RARIK/Pétur Ágúst Unnsteinsso - Dælustoð í Hoffelli
Framkvæmdum við nýja hitaveitu á Höfn í Hornafirði miðar vel og senn líkur lagningu á 20 kílómetra stofnlögn frá heitavatnsholum í Hoffelli. Mögulega verður varmadælu bætt í hitaveituna til að nýta orku úr affallsvatni.

Heitavatnstankur er risinn í Hoffelli og samkvæmt upplýsingum frá RARIK er nú verið að ljúka við borholuhús og dælustöðvar þar og á Stapa. Einnig þarf að breyta kyndistöðinni á Hornafirði sem hefur hitað vatn með rafmagni eða olíu. Í kyndistöðinni verður mögulega komið fyrir varmadælu til að nýta varma úr svokölluðu bakvatni sem kemur frá húsum. Það er óvíst hvort þörf verður á slíku en þá yrði það gert til að bæta nýtingu svæðisins. 

RARIK stefnir á að tengja nýju stofnlögnina við dreifikerfi veitunnar á Höfn fyrir áramót. Tveir þriðju hlutar bæjarbúa eru tengdir gömlu fjarvarmaveitunni og fá því hitaveituvatn nánast um leið. Næstir í röðinni eru nýir notendur í Nesjum og Nesjahverfi. Hinir þurfa að bíða en mislengi. Nú þegar hafa um 100 heimili og fyrirtæki á Höfn sótt um tengingu við nýja hitaveitu. Strax eftir áramót verður haldið áfram að tengja hús sem liggja við dreifikerfið og fljótlega býður RARIK svo út nýjar stofnlagnir í Vesturbraut og Silfurbraut. Áætlað er að þær framkvæmdir geti hafist snemma næsta vor og í framhaldinu geta nýir notendur í þeim götum tengst hitaveitunni.

Uppfært: 02.12.2020

Í upphaflegri útgáfu var orðalag sem gaf til kynna að óvissa væri um jarðhitasvæðið í Hoffelli en rétt er að svæðið hefur verið þolþrófað og ekki þörf á að nýta kyndistöðina áfram.