Báðir helstu bakverðir Everton voru meiddir og því ekki með liðinu í dag. Carlo Ancelotti stillti því upp þremur miðvörðum og spilaði með Tom Davies og Alex Iwobi sem vængbakverði. Bæði lið virtust ákveðin í að sækja og sköpuðu sér fín færi. Leeds áttu sérstaklega hættulegar sóknir í fyrri hálfleik en Jordan Pickford, markvörður Everton var þá vel á verði í markinu. Rétt fyrir hálfleik skoruðu Everton en markið var réttilega dæmt af vegna rangstöðu. Í næstu sókn átti Leeds þrumuskot í stöngina. Staðan var því markalaus í hálfleik. 

Seinni hálfleikur fór fram með svipuðu sniði. Bæði lið sóttu og áttu fjölmargar marktilraunir án þess þó að skora. Leeds komst nálægt því á 67. mínútu en mark Patrick Bamford var dæmt af. Rúmlega 10 mínútum fyrir leikslok náði Raphinha að skora fyrir Leeds með góðu skoti og reyndist það vera eina mark leiksins. 

Sigurinn kemur Leeds aftur á beinu brautina en liðið var án sigurs í síðustu þremur leikjum sínum. Everton hefur að sama skapi tapað síðustu fjórum af síðustu fimm leikjum sínum.