Athugið þessi frétt er meira en mánaðargömul.

Fimm smit hafa greinst í nærumhverfi Víðis

Mynd með færslu
 Mynd: RÚV
Víðir Reynisson yfirlögregluþjónn hjá Almannavarnardeild ríkislögreglustjóra er á fjórða degi COVID-19 veikinda. Hann segist hafa verið verulega slappur í gær, en dagurinn í dag sé skárri.

Víðir greinir frá þessu á facebook-síðu sinni.

Þar segir hann að frá því faraldurinn kom upp hér á landi hafi hann og eiginkona hans þrengt verulega þann hóp sem þau umgangist. „Það gerðum við til þess að lágmarka áhættu á því að bera smit á milli. Þó gerðist það að við smituðumst og þegar það var staðfest var ljóst að fólk í okkar nánasta umhverfi var útsett fyrir veirunni,“ skrifar Víðir.

Mánudaginn 23. nóvember fór eiginkona Víðis að finna fyrir einkennum og fór í sýnatöku. Síðdegis sama dag fékk hún staðfestingu á smiti. „Smitrakning fór þá strax í gang og var ákveðið að þar sem hún hefði lítil einkenni, en lága CT tölu sem þýddi að hún væri talsvert smitandi, að fara 48 tíma til baka varðandi þá sem þyrftu að fara í sóttkví okkar vegna. Einnig var ákveðið að skima talsvert marga aðra í okkar umhverfi,“ skrifar Víðir.

Uppruni smitsins er óþekktur

Uppruni smit eiginkonu Víðis er óþekktur og hefur smitrakning ekki skilað árangri. Vinnufélagar hennar hafa allir farið í skimun og reynst neikvæðir. Helgina áður en hún greindist með smit kom vinafólk hjónanna utan af landi til að búa hjá þeim tímabundið vegna læknisþjónustu sem þau þurftu að sækja. 

„Dætur þeirra kíktu stutt í kaffi á sunnudeginum. Vinkona okkar kom stutt við í kaffi líka. Börn okkar, tengdadóttir og barnabarn komu einnig við og um kvöldið komu til okkar vinahjón sem stoppuðu stutt. Í öllum tilfellum var passað upp á fjarlægðir á milli okkar og gesta og reyndum að forðast sameiginlega snertifleti. Þegar smitrakning hafi lokið að fara yfir tilfelli okkar þótti ljóst að 12 voru útsettir að mér meðtöldum og fóru í sóttkví,“ skrifar Víðir.

Vatnskanna, bollar og glös hafa dugað til að smita

„Í dag er staðan þannig að auk okkar hjóna hafa fimm aðrir úr hópnum greinst með staðfesta COVID-19 sýkingu. Vinafólk okkar sem búa hjá okkur voru augljóslega mikið útsett. Smit annarra sýnir svo ekki sé um villst hversu smitandi þessi veira er. Við erum búin að fara vel yfir öll samskiptin og höfum fundið að fjarlægð sem var haldin var um eða yfir 2 metra við alla. Hins vegar er ljóst að við pössuðum ekki upp á alla sameiginlega snertifleti. Vatnsskanna, kaffibollar og glös hafa sennilega verið sameiginlegir snertifletir sem hafa dugað til að smita.“

„Sjálfur hef ég verið manna duglegastur við að hvetja alla til að passa eigin sóttvarnir og því þungbært að þetta sé staðan. Við getum ekki annað en vonað að við öll, eins og allir þeir fjölmörgu sem eru að berjast við þennan óvætt komum heil út úr þessu,“ skrifar Víðir í facebook-færslu sinni.