Mynd: EPA-EFE - EPA
Athugið þessi frétt er meira en mánaðargömul.
Mannskætt óveður á sunnanverðu Indlandi
Hitabeltisstormurinn Nivar tók land á suðurströnd Indlands í nótt, með meðalvindhraða upp á 36 metra á sekúndu og óhemjuúrhelli í farteskinu. Í héruðunum Tamil Nadu, Andhra Pradesh og Puducherry hefur nær 200.000 manns verið gert að yfirgefa heimili sín og forða sér í öruggt skjól í þar til gerðum neyðarskýlum. Vitað er um eitt dauðsfall af völdum óveðursins til þessa.
Hitabeltisstormurinn Nivar tók land á suðurströnd Indlands í nótt, með meðalvindhraða upp á 36 metra á sekúndu og óhemjuúrhelli í farteskinu. Í héruðunum Tamil Nadu, Andhra Pradesh og Puducherry hefur nær 200.000 manns verið gert að yfirgefa heimili sín og forða sér í öruggt skjól í þar til gerðum neyðarskýlum. Fjölmennt hjálparlið hefur verið sent á hamfarasvæðið og rafmagn tekið af nokkrum borgum til að fyrirbyggja tjón á dreifingarkerfinu.
Ein kona hefur látið lífið í óveðrinu svo staðfest sé og tjón á gróðri og mannvirkjum er þegar orðið umtalsvert. Tré hafa rifnað upp með rótum, ár flætt yfir bakka sína og aurskriður fallið. Stjórnvöld hafa lýst daginn í dag frídag og fyrirskipað að öllum verslunum, fyrirtækjum og stofnunum sem ekki sinna nauðsynlegustu þjónustu skuli lokað.
