Athugið þessi frétt er meira en mánaðargömul.

Vigdís vill verða næsti borgarstjóri

Mynd með færslu
 Mynd:
Vigdís Hauksdóttir vill gefa kost á sér sem borgarstjóri. Hennar fyrsta val í borgarstjórnarsamstarfi væri Sjálfstæðisflokkurinn. Á aukalandsþingi Miðflokksins liðna helgi bauð Vigdís sig ein fram til varaformannsembættis en kosið var um að leggja embættið niður og fjölga í stjórn flokksins í sex manns.

Þingflokksformaður, Gunnar Bragi Sveinsson, er því talsmaður stjórnar í forföllum formanns.

„Miðflokksmenn og aðrir eru mjög ánægðir með mín störf í borgarstjórn og ég stefni einbeitt á það að gefa kost á mér sem næsti borgarstjóri,“ sagði Vigdís í viðtali í þættinum 21 á Hringbraut.

Hún sagði símann hafa verið rauðglóandi eftir flokksþingið og að hún hafi heyrt í mörgum óánægðum flokksmönnum. Hún stefni einbeitt á að auka fylgi flokksins og ná kjöri borgarstjórnarkosningum 2022.