Mynd: Alþingi
Athugið þessi frétt er meira en 10 mánaða gömul.
Spítalinn vissi af gríðarlegum uppsöfnuðum halla
Svandís Svavarsdóttir heilbrigðisráðherra segir að því miður hafi Landspítalinn vitað af gríðarlegum uppsöfnuðum halla. Aðhaldskrafa stjórnvalda sé eftir sem áður 0,5 prósent á heilbrigðisþjónustu. Ráðherra segir ljóst að spítalinn fái allan viðbótarkostnað vegna COVID-19 bættan.
Málefni Landspítalans og fjármál tengd rekstrinum brunnu á þingmönnum við upphaf þingfundar á Alþingi í dag og var spurningum beint til heilbrigðisráðherra. Eins og fram hefur komið í fréttum telur spítalinn að hann vanti 4,3 milljarða til viðbótar við það fjármagn sem honum er skammtað í fjárlagafrumvarpinu til rekstursins næsta árs.
Fundað verður í heilbrigðisráðuneytinu á næstu dögum með fulltrúum spítalans til að fara yfir aðgerðir til að koma til móts við hallann. Fjárlög eru enn til meðferðar í fjárlaganefnd Alþingis og var annarri umræðu sem átti að fara fram í dag frestað fram í desember. Þess má geta að fulltrúar Landspítalans koma fyrir nefndina á morgun.
Þingmaður Pírata segir spítalann vanfjármagnaðan um marga milljarða og gagnrýndi stjórnvöld harðlega á Alþingi í dag.
„Ég vil spyrja hæstvirtan ráðherra af hverju burðarstólpi heilbrigðiskerfisins – þar sem að starfsfólk hefur þurft að starfa undir ómanneskjulegu álagi undanfarin ár – sé vanfjármagnaður um marga milljarða?“ spurði Sara Elísa Þórðardóttir á Alþingi í dag.
Svandís Svavarsdóttir heilbrigðisráðherra var til svara: „Þá er það svo að því miður að Landspítalinn veit og vissi af þessum halla og vissi af því hvernig hann liti út en aðhaldskrafa stjórnvalda er 0,5 prósent á ári hverju á heilbrigðisþjónustu.“
