Athugið þessi frétt er meira en mánaðargömul.

Fá ekkert á krókana eftir að togarar fara um „Skápinn“

24.11.2020 - 17:55
Mynd með færslu
 Mynd: Rúnar Snær Reynisson - RÚV
Smábátasjómenn á Borgarfirði eystra vilja að fiskimið þeirra skammt frá þorpinu verði friðuð fyrir togveiðum og ekki verði lengur leyft að draga veiðarfæri eftir botninum þar á grunnslóð. Almennt er slíkt bannað innan 12 sjómílna frá landi en á nokkrum stöðum má toga nær ströndinni eða allt að 6 sjómílur frá landi. Það á við um þetta svæði sem er í daglegu tali kallað Skápurinn.

Í nýlegri bókun heimastjórnar á Borgarfirði segir að á meðan Skápurinn sé opinn fyrir togurum þurfi smábátar að róa langt eða allt að 40 sjómílur til að eiga von á afla. Ólafur Hallgrímsson sjómaður sem situr í heimastjórn segir að eftir að togarar kemba svæðið í lok ágúst fái smábátasjómenn ekkert á krókana, eða lítið, í langan tíma. Svo virðist sem fiskurinn styggist. Veiðar á þessum stað skipti ekki sköpum fyrir togara en mun meira máli fyrir borgfirska sjómenn enda séu þetta heimamið þeirra. ,,Við neitum að trúa því að það sé svo slæmt ástand á fiskimiðum við landið að þessi litli blettur skipti höfuðmáli fyrir útgerð togara," segir hann.

Borgfirðingar hafi talað fyrir daufum eyrum um þetta mál í áratugi síðan Halldór Ásgrímsson var sjávarútvegsráðherra. 

 

runarsr's picture
Rúnar Snær Reynisson
Fréttastofa RÚV