Mynd:
Athugið þessi frétt er meira en mánaðargömul.
Félag Íslendinga og Þjóðverja keypti Hjörleifshöfða
Mýrdalssandur ehf, félag í eigu Íslendinga og Þjóðverja, hefur keypt Hjörleifshöfða í Mýrdalshreppi. Jörðin hafði verið í sölu í á fimmta ár, eða frá því í júní 2016 að sögn Ólafs Björnssonar hjá Lögmönnum Suðurlandi sem annaðist söluna.
Mýrdalssandur ehf hefur meðal annars þurrkað sand sem hefur verið fluttur út til sandblásturs. Að sögn Ólafs hyggja nýir eigendur Hjörleifshöfða á slíka vinnslu á jörðinni.
Jörðin Hjörleifshöfði er um 11.500 hektarar og Ólafur segir að verðhugmyndin hafi verið á bilinu hálfur til einn milljarður króna.
„Jörðin hafði verið lengi til sölu og allnokkrir sýnt áhuga á þessum tíma,“ segir Ólafur. Hann segir að salan sé nú í þinglýsingarferli en staðfestir að jörðin hefði selst á rúmlega hálfan milljarð.
Á vef Kötlu Geopark segir um Hjörleifshöfða að hann sé 221 metra hár móbergsstapi á suðvestanverðum Mýrdalssandi. Hjörleifshöfði er landnámsjörð og fékk nafn sitt frá landnámsmanninum Hjörleifi Hróðmarssyni, fóstbróður Ingólfs Arnarsonar. Þeir fóru á sitt hvoru skipinu til Íslands en urðu viðskila þar sem Ingólfur hafði vetursetu við Ingólfshöfða en fóstbróðirinn á Hjörleifshöfða.
Búið var á Hjörleifshöfða fram að árinu 1936 á bæ staðsettum á syðri hluta höfðans, en sá var fluttur þangað eftir gosið í Kötlu 1721 sem eyddi gamla bænum.
