Dæmdur fyrir steypubílaakstur og bruna á Pablo Discobar

Mynd með færslu
 Mynd: Samsett mynd - RÚV
Þrítugur karlmaður sem í mars síðastliðnum olli stórhættu þegar hann stal steypubíl í miðbæ Reykjavíkur og ók á móti umferð hefur verið dæmdur í þriggja ára fangelsi.

Játaði brot sín greiðlega

Maðurinn hefur setið í gæsluvarðhaldi frá 19. mars síðastliðnum. Auk þess að stela steypubíl og valda almannahættu er maðurinn dæmdur fyrir íkveikju á skemmtistaðnum Pablo Discobar, vörslu fíkniefna, þjófnaði og fjársvik. Litið var til þess við ákvörðun refsingar að maðurinn játaði brot sín greiðlega, bæði fyrir dómi og að mestu á rannsóknarstigi. 

Brotin vöktu mikla athygli í fjölmiðlum

Steypubílnum, sem lögregla veitti eftirför í miðbæ Reykjavíkur, var stolið við Vitastíg. Maðurinn ók niður Laugaveg, eftir Bankastræti og austur Sæbraut og var síðan króaður af við Kassagerðina. Engin slys urðu á fólki.  Mikil mildi þótti að ekki fór verr og er maðurinn talinn hafa valdið almannahættu. Manninum var sleppt að lokinni yfirheyrslu.

Handtekinn fyrir íkveikju skömmu eftir eltingaleikinn á steypubílnum

Hann var svo handtekinn aftur tæpri viku síðar grunaður um aðild að eldsvoða í húsakynnum skemmtistaðarins Pablo Discobar og veitingastaðarins Burro við Veltusund.

Allt tiltækt slökkvilið var kallað út, enda er skemmtistaðurinn á þriðju hæð í stóru timburhúsi. Þónokkur eldur logaði í húsinu og mikinn reyk lagði frá því, og um tíma var óttast að eldurinn bærist í samliggjandi hús. Það gerðist þó ekki, slökkvistarf gekk vel. Mikið tjón varð í eldsvoðanum.

Mynd með færslu
Mikil mildi þótti að enginn slasaðist í háskaför steypubílsins