Á annað hundrað meðferðum frestað vegna COVID

Drónamynd af Reykjalundi
 Mynd: Ingvar Haukur Guðmundsson - RÚV/Ingvar Haukur Guðmundsson
Meðferðum hjá á annað hundrað skjólstæðingum dag- og göngudeilda Reykjalundar verður frestað í næstu viku. Þetta ákvað framkvæmdastjórn Reykjalundar eftir að fimm sjúklingar og fimm starfsmenn á Reykjalundi greindust með kórónuveirusmit. 30 starfsmenn og 11 sjúklingar eru í sóttkví.

Starfsemi sólarhringsdeildarinnar á Miðgarði og starfsemi Hleinar heldur áfram, en búast má við einhverri skerðingu á þjónustu þar, samkvæmt tilkynningu frá Pétri Magnússyni, forstjóra Reykjalundar.

Þar segir að á fimmtudag hafi komið upp grunur um smit á deildinni Miðgarði á Reykjalundi sem er sólarhringsdeild með 14 rúmum. Þar dvöldu í síðustu viku 16 sjúklingar af Landspítala, en Reykjalundur hefur verið að leggja sitt af mörkum síðustu daga með því að taka við sjúklingum þaðan  til að létta þar á. Á fimmtudagskvöldið greindust tveir starfsmenn deildarinnar jákvæðir. Flestir starfsmenn og allir sjúklingar deildarinnar voru þá settir í sóttkví.

 

„Í gær lágu fyrir niðurstöður úr sýnatöku og hefur því miður komið í ljós að fimm úr sjúklingahópnum eru jákvæðir fyrir COVID-veirunni og er einn þeirra kominn með einkenni. Umræddir sjúklingar voru af öryggisástæðum fluttir af Reykjalundi á COVID-deildir Landspítala seint í gærkvöldi eftir að sjúklingunum og aðstandendum þeirra hafði verið kynnt staða mála,“ segir í tilkynningunni.

Af þessum fimm sem smitaðir eru komu þrír frá Landakoti á Reykjalund í síðustu viku. „Nú hafa því 5 sjúklingar og 5 starfsmenn greinst jákvæðir fyrir COVID-veirunni undanfarna þrjá sólarhringa. Jafnframt eru um 30 aðrir starfsmenn Reykjalundar komnir í sóttkví vegna þessa eins og er, auk þeirra 11 sjúklinga sem eftir eru á deildinni Miðgarði,“ segir í tilkynningunni.

Þar segir að starfsemi Reykjalundar hafi farið fram í skilgreindum sóttvarnarhólfum undanfarnar vikur þannig að starfsemi Miðgarðs hefur verið aðskilin annarri starfsemi.  Síðan málið kom upp hefur starfsfólk annara deilda á Reykjalundi komið til aðstoðar við að manna vaktir á Miðgarði og ýmis verk og verkefni sem þessu erfiða máli tengjast, ekki síst þar sem nánast allt starfsfólk Miðgarðs er í sóttkví. Ljóst sé að það starfsfólk fer ekki til baka í sín hefðbundnu störf næstu daga.

Í tilkynningunni sendir Pétur þakkarkveðjur til starfsfólks Miðgarðs og allra annara starfsmanna Reykjalundar sem hafa verið að koma þar beint til starfa eða tengjast verkum og verkefnum tengdum þessum málum. „Að lokum vil ég harma þau óþægindi sem þetta mál hefur fyrir sjúklinga og aðra skjólstæðinga Reykjalundar, sem og aðstandendur þeirra,“ segir Pétur í tilkynningunni.