Athugið þessi frétt er meira en mánaðargömul.

Útgerðin hafnaði tilmælum læknis um að koma í land

22.10.2020 - 15:13
Mynd með færslu
 Mynd: Jóhannes Jónsson - RÚV
Hraðfrystihúsið Gunnvör hafnaði ítrekuðum beiðnum sóttvarnalæknis um að koma í land vegna veikinda skipverja. Þetta segir í yfirlýsingu Sjómannasambands Íslands um hópsýkingu í áhöfn frystitogarans Júlíusar Geirmundssonar.

Þar segir jafnframt að samkvæmt upplýsingum frá umdæmislækni sóttvarna á Vestfjörðum hafi verið óskað eftir því við útgerðina að skipið kæmi í land vegna veikinda skipverja. Beiðnin hafi svo verið ítrekuð þegar leið á veiðiferðina og fleiri veiktust. Útgerðin hafi hafnað þessum beiðnum.

Sjómannasambandið segist líta viðbrögð útgerðarinnar alvarlegum augum og að hún hafi hunsað skýr tilmæli til útgerða og sjómanna um hvernig ætti að bregðast við ef veikindi kæmu upp um borð. Tilmælin voru send út þegar faraldurinn hófst. 

Sambandið telur að í þessu tilviki virðist útgerðin einungis hafa hugsað um fjárhagslegan ávinning fremur en heilsu og velferð áhafnarinnar. Það krefjist þess að íslenskar útgerðir fari að tilmælum og stofni ekki lífi og limum áhafna sinna í hættu að óþörfu. 

Hér má lesa yfirlýsinguna í heild sinni.