Athugið þessi frétt er meira en 8 mánaða gömul.

Sóttvarnarreglur hertar í Póllandi

15.10.2020 - 17:53
epa08747657 A Polish medical staff works at the COVID-19 testing lab in Warsaw, Poland, 15 October 2020. The number of confirmed coronavirus cases in Poland has increased since 14 October by 8,099 new infections, and reached 149,903, the Polish Ministry of Health said on 15 October morning.  EPA-EFE/Piotr Nowak POLAND OUT
Skimað fyrir veirunni í Varsjá. Mynd: EPA-EFE - PAP
Stjórnvöld í Póllandi boða hertar reglur frá næsta laugardegi vegna fjölgunar kórónuveirusmita að undanförnu. Höfuðborgin Varsjá og nokkrar borgir til viðbótar verða skilgreindar rautt hættusvæði. 

Mateusz Morawiecki forsætisráðherra skoraði í dag á landsmenn að halda sig heima, ef þeir ættu þess kost. Einnig bað hann fólk að vinna heima ef það sæi sér fært.

Kórónuveiran breiðist hratt út í Póllandi um þessar mundir, líkt og víða annars staðar. Alls reyndust 8.099 sýni jákvæð síðastliðinn sólarhring, hið mesta til þessa. Þau eru þar með orðin tæplega 150 þúsund frá hið fyrsta greindist jákvætt fjórða mars. 

Morawiecki sagði í dag að loknum fundi með neyðarteymi ríkisstjórnarinnar í Varsjá að allt landið hefði verið skilgreint gult hættusvæði að undanförnu, en frá laugardegi yrðu höfuðborgin og nokkrar borgir til viðbótar settar á rautt. Öllum miðskólum í landinu verður lokað tímabundið og nemendum gert að stunda námið í fjarkennslu. Veitingahúsum á að loka klukkan níu á kvöldin, brúðkaupsveislur verða bannaðar, fjöldatakmarkanir verða við trúarathafnir og  hert á reglum um fjölda fólks í einu inni í verslunum og í almenningsfarartækjumsvo nokkuð sé nefnt.

Forsætisráðherrann sagði að aðgerðirnar miðuðu að því að bjarga mannslífum, ekki síst meðal eldri borgara. Ástandið færi sífellt versnandi í löndum á meginlandi Evrópu. Pólverjar væru þar ekki undanskildir.

 

asgeirt's picture
Ásgeir Tómasson
Fréttastofa RÚV