Beita sér fyrir bættum mannréttindum á Filippseyjum

26.09.2020 - 14:02
Mynd með færslu
 Mynd: EPA
Ísland hefur lagt fram ályktun í mannréttindaráði Sameinuðu þjóðanna um samstarf stjórnvalda á Filippseyjum við skrifstofu mannréttindafulltrúa Sameinuðu þjóðanna um úrbætur í mannréttindamálum þar í landi.

Þetta kemur fram á vef Stjórnarráðsins. Ályktunin er lögð fram í samvinnu við filippseysk stjórnvöld. Þarlend stjórnvöld skuldbinda sig til að vinna með mannréttindafulltrúanum að umbótum í mannréttindamálum. Ályktunin verður tekin til atkvæða í mannréttindaráðinu í næsta mánuði.

„Við höfum gagnrýnt framgöngu stjórnvalda á Filippseyjum í mannréttindamáluml. Á hinn bóginn skiptir máli að eiga samráð og samtöl við þau ríki sem til skoðunar eru hverju sinni hjá mannréttindaráðinu, ekki síst ef þau virðast tilbúin til slíks samtals og eru reiðubúin til að vinna að úrbótum í samvinnu við stofnanir Sameinuðu þjóðanna.“ segir Guðlaugur Þór Þórðarson, utanríkis- og þróunarsamvinnuráðherra.

Sumarið 2019 beitti Ísland sér fyrir samþykkt ályktunnar um ástand mannréttinda á Filipseyjum. Með ályktuninni lýsti mannréttindaráðið formlega yfir áhyggjum af ástandinu í landinu, hvatti stjórnvöld til að stöðva aftökur án dóms og laga í nafni herferðar gegn fíkniefnum og draga þá til ábyrgðar sem stæðu fyrir slíku. Mannréttindafulltrúa Sameinuðu þjóðanna (OHCHR) var falið að gera skýrslu um stöðu mannréttindamála á Filippseyjum. 

Sú skýrsla var lögð fram í mannréttindaráðinu í sumar. Hún staðfesti að fullt tilefni var til að taka málefni Filippseyja á dagskrá. Enda þótt stjórnvöld á Filippseyjum hafi brugðist hart við samþykkt ályktunarinnar sumarið 2019 og hafnað niðurstöðum skýrslunnar í sumar, komst á samtal milli fastanefnda Íslands og Filippseyja í Genf. Niðurstaða þess er sameiginleg ályktun þessara ríkja í ráðinu sem lögð var fram í gær.  

 

Forseti Filipseyja var harðorður í garð Íslands vegna ályktanna í mannréttindaráði SÞ, sagði þá borða of mikinn ís og að enginn munur á nóttu og degi séu vandamál Íslands. Engir glæpir og lögreglumenn séu á Íslandi og Íslendingar sitji bara og borði ís. Þeir skilji ekki félagsfræðileg og pólitísk vandamál á Filippseyjum.

 

Í nýju ályktuninni er vísað til ályktunar Íslands í mannréttindaráðinu sumarið 2019 sem og í skýrsluna sem gerð var af OHCHR fyrir mannréttindaráðið. Stjórnvöld á Filippseyjum eru hvött til að taka á þeim málum sem þar er fjallað um. Ályktunin kveður á um samstarf Filippseyja við OHCHR og aðrar stofnanir SÞ á Filippseyjum um úrbætur í mannréttindamálum. Er m.a. kveðið á um styrkingu landaskrifstofu OHCHR á Filippseyjum til að sinna því verkefni og er sérstaklega áréttað á hvaða sviðum mannréttinda umbætur verði að eiga sér stað: a) stefna stjórnvalda í fíkniefnamálum; b) lögregluofbeldi; c) hvernig best verði staðið að því að draga þá til ábyrgðar sem brjóta mannréttindi; d) aðferðir sem beitt er í baráttu gegn hryðjuverkahópum; e) samstarf stjórnvalda við frjáls félagasamtök. 

Ályktunin leggur upp tveggja ára verkefni sem verður fylgt eftir með frekari skýrslugjöf til mannréttindaráðsins um framkvæmd og árangur samstarfs OHCHR og Filippseyja, sem og um framkvæmd ályktunarinnar. 

 

 

 

bjarnir's picture
Bjarni Rúnarsson
Fréttastofa RÚV
Síðast:
Þessi þáttur er í hlaðvarpi