Mynd: EPA-EFE - AAP POOL
Athugið þessi frétt er meira en mánaðargömul.
Hundruð hvala strandaðir við Tasmaníu
Björgunarfólk í Ástralíu segir 200 hvali hafa komist í ógöngur til viðbótar við þá 270 sem fyrir voru í afskekktum flóa í Tasmaníu. Talskona ráðuneytis umhverfismála í Tasmaníu greindi AFP fréttastofunni frá því í gærkvöld að grindhvalirnir 200 hafi fundist um sjö til tíu kílómetrum innar í flóanum. Nú er talið að aðeins tugir hvala séu enn lifandi.
Björgunarfólk var á leið inn flóann þegar talskonan ræddi við AFP. Nýja vaðan fannst við leit úr lofti snemma í morgun að staðartíma, eða í gærkvöld að íslenskum tíma. Hinir 270 fundust á mánudag. Sérstakir dráttarbátar voru notaðir til þess að reyna að teyma þá sem enn voru á lífi í átt að opnu hafinu.
Nokkrir hvalanna sem komið var til bjargar í gær komu sér aftur í ógöngur, líkt og sérfræðingar bjuggust raunar við. Nic Deka, forstöðumaður umhverfisverndarsviðs Tasmaníu, segir góðu fréttirnar hins vegar þær að meirihluti þeirra sem komið var til bjargar haldi sig í dýpri enda hafsins.
Stærsti hluti hvalanna festi sig í sandrifi, sem aðeins er fært á litlum bátum.
Sérfræðingar eru óvissir um hvers vegna hvalir eiga það til að stranda í hópum. Einhverjir telja að það sé vegna þess að grindhvalir séu það miklar hópskepnur að þeir hafi mögulega fylgt einum eða tveimur hvölum sem villtust af leið við fæðuöflun.
