Hamagangur í torfærukeppni helgarinnar

Mynd: RÚV / RÚV

Hamagangur í torfærukeppni helgarinnar

13.09.2020 - 20:10
Mikil átök voru í Greifatorfærunni sem fram fór á Akureyri um helgina. Keppnin var sú þriðja af fjórum í Íslandsmótinu sem þurfti að stytta um tvær keppnir vegna COVID-19.

 

Í sérútbúna flokknum voru 13 keppendur skráðir til leiks. Átökin í gryfjunum í Glerárdal voru mikil og velti Ásmundur Ingjaldsson bíl sínum harkalega í sjöttu og síðustu braut en slapp að sjálfsögðu ómeiddur, þökk sé góðum öryggisbúnaði. Hann varð þó að sætta sig við fimmta sætið í flokknum.

Í þriðja sæti varð Ólafur Bragi Jónsson á nýsmíðaða Refnum, hann var þó tæpum 400 stigum á eftir öðru sætinu. Slagurinn á toppnum var á milli þeirra Hauks Einarssonar á Eurol Heklunni og Ingólfs Guðvarðarsonar á Guttanum Reborn.

Haukur náði forustu í fyrstu braut og leiddi í hádegishléi en í þriðju braut, sem var tímabraut, náði Ingólfur forystunni eftir frábæran akstur.

Haukur gerði mistök í fjórðu braut sem að þýddi að góður og yfirvegaður akstur Ingólfs í síðustu brautum keppninnar tryggði honum sigurinn, 100 stigum á undan Hauki.

Skúli Kristjánsson á Simba var jafn Ingólfi í fyrsta sæti Íslandsmótsins fyrir keppnina en hann varð frá að hverfa í fjórðu braut og eru titilvonir Skúla því úr sögunni.

Ingólfur leiðir mótið þegar ein umferð er eftir með 9 stiga forskot á Hauk, því nægir Ingólfi fimmta sætið í síðustu umferðinni sem fram fer í Hafnarfirði 3. október.

Í götubílaflokki varð það enn og aftur Steingrímur Bjarnason sem sigraði og er hann með fullt hús stiga í Íslandsmótinu.

Sjá má viðtöl við Ingólf Guðvarðarson og Hauk Viðar Einarsson í myndskeiðinu við þessa frétt Braga Þórðarsonar.