Athugið þessi frétt er meira en mánaðargömul.

Flóttafólk á Miðjarðarhafi flutt milli skipa

epa05265406 A handout photgraph made available by the Ong Sos Méditerranée showing migrants on a snking inflatable boat before being rescued by  the Aquarius ship of the humanitarian group SOS Mediterranee, and taken to  Lampesusa, Italy, 18 April 2016.
Flótta- og farandfólk í gúmmíbát sem er við það að sökkva, á Miðjarðarhafi í apríl á þessu ári.  Mynd: EPA - ONG SOS MEDITERRANEE
Flóttafólk sem þurfti að hafast við í rúman mánuð um borð í einu skipa danska Maersk skipafélagsins hefur verið flutt yfir í skip á vegum mannúðarsamtaka. Þar á að veita fólkinu læknisaðstoð.

Talsmaður skipafélagsins greinir frá því í yfirlýsingu að fólkið, 27 að tölu, sé nú komið um borð í skipið Mare Jonio sem áhugamannasamtökin Mediterranea eiga og reka á Miðjarðarhafi.

Talsmaðurinn segir að andleg og líkamleg heilsa flóttafólksins hafi verið áhyggjuefni enda löng dvöl á hafi úti að baki. Nú taki við greining á heilsufari fólksins en í hópnum er ófrísk kona og barn.

Áhöfn skipsins Etienne brást við ákalli yfirvalda á Möltu um að sækja fólkið 4. ágúst síðastliðinn en síðan þá hefur skipinu verið meinað að leggja nokkurs staðar að landi. Vistaskiptin eru ekki talin tryggja að fólkið fá fast land undir fætur á næstunni.

Tölur frá Flóttamannahjálp Sameinuðu þjóðanna sýna að á fimmtánda þúsund reyndi að komast frá Líbíu til Evrópu fyrri helming ársins 2020, iðulega með yfirfullum og ótraustum fleyjum.