Mynd: EPA - EPA
Handteknir við að afhenda „Hamasliða“ vopnabúnað
Tveir Bandaríkjamenn á þrítugsaldri hafa verið handteknir og ákærðir eftir að þeir létu manni sem þeir héldu fulltrúa Hamas-samtakanna hljóðdeyfa og annan búnað fyrir byssur í té.
Mennirnir, Michael Solomon og Benjamin Teeter, viðurkenna að þeir tilheyri óformlegum öfga-hægri samtökum sem ganga undir heitinu Boogaloo Bois.
Samtökin voru lítt kunn þar til meðlimir þeirra urðu áberandi í mótmælum vestra í kjölfar dauða Georges Floyd. Þar beittu þeir öllum brögðum til að lenda í útistöðum við lögreglu.
Sá sem þeir Teeter og Solomon afhentu vopnabúnaðinn var alríkisfulltrúi sem þóttist vera háttsettur Hamas-liði. Hamas ráða ríkjum á Gaza-svæðinu og viðurkenna ekki tilvist Ísraelsríkis. Bæði Bandaríkjastjórn og stjórn Ísraels álíta Hamas vera hryðjuverkasamtök.
Yfirlýst markmið Boogaloo samtakanna er að efna til nýrrar borgararstyrjaldar í þeim tilgangi að fella ríkisstjórn Bandaríkjanna.
