Engin innanlandssmit í gær - þrjú við landamærin

11.08.2020 - 11:03
Mynd með færslu
 Mynd: RÚV - Rúnar Ingi Garðarsson - RÚV
Þrjú kórónuveirusmit greindust í gær, öll við landamæraskimun. Ekkert smit greindist innanlands. Jákvæð niðurstaða fékkst úr einni skimun þar sem beðið hafði verið eftir mótefnamælingu. Þá bíða tveir eftir mótefnamælingu eftir landamæraskimun. Enn eru tveir á sjukrahúsi þar af annar á gjörgæslu. Nýgengi smita innanlands hefur lækkað, en hefur hækkað við landamærin.

Fólki í sóttkví hefur fækkað síðan í gær. Þá voru 938 í sóttkví, en eru nú 839 sem er fækkun um tæplega 100. 

Stærstur hluti þeirra sem eru í sóttkví er búsettur á höfuðborgarsvæðinu, eða 547. Þar á eftir kemur Suðurland, þar sem 98 eru í sóttkví.

Alls voru greind 3.450 sýni í gær. Sýkla- og veirufræðideild Landspítala greindi 289, við landamærin voru þau 3.105 og Íslensk erfðagreining greindi 56 sýni.

Í fyrradag greindust tvö smit innanlands, eitt við landamærin og jákvæð niðurstaða fékkst úr einni skimun þar sem beðið hafði verið eftir mótefnamælingu. Í fyrradag greindust þrjú innanlandssmit og ekkert við landamæraskimun. 

Nýgengi innanlandssmita, þ.e. hversu mörg smit hafa greinst á hverja 100.000 íbúa undanfarna 14 daga, er nú 24,8, það var 25,9 í gær og  27 í fyrradag. Nýgengi landamærasmita er nú 4,6, en var 3,5 í gær og  3,0 í fyrradag.

 
annalth's picture
Anna Lilja Þórisdóttir
Síðast:
Þessi þáttur er í hlaðvarpi