Hertar aðgerðir í tíu liðum

30.07.2020 - 11:28
Fundur ríkisstjórnarinnar 30072020
 Mynd: Hólmfríður Dagný Friðjónsd - Rúv
Hertar aðgerðir í tíu liðum vegna COVID-19 taka gildi innanlands og á landamærunum á hádegi á morgun. Þær gilda að óbreyttu til 13. ágúst og eru byggðar á tillögum sóttvarnalæknis sem heilbrigðisráðherra hefur samþykkt. Í þeim felst meðal annars að efla gæti þurft aðgerðir á landamærunum enn frekar.

Í minnisblaðinu mælir sóttvarnalæknir með eftirfarandi ráðstöfunum til eflingar sóttvörnum:

  • Takmörkun á fjölda sem kemur saman miðast við 100 einstaklinga. Börn fædd 2005 eða síðar eru undanskilin.
  • Hvar sem fólk kemur saman og í allri starfsemi verði viðhöfð sú regla að hafa a.m.k. 2 metra á milli einstaklinga. 
  • Þar sem ekki er hægt að tryggja 2 metra fjarlægð milli ótengdra einstaklinga er krafist notkunar andlitsgrímu sem hylur nef og munn. Þetta á t.d. við um almenningssamgöngur, þ.m.t. innanlandsflug og farþegaferjur, og starfsemi s.s. hárgreiðslustofur og nuddstofur. Andlitsgrímur sem notaðar eru utan heilbrigðisþjónustu ættu að uppfylla kröfur sem settar eru fram í leiðbeiningum sóttvarnalæknis.
  • Vinnustaðir, opinberar byggingar, verslanir og þjónustufyrirtæki sem eru opin almenningi skipuleggi starfsemi sína í samræmi við ofangreint og tryggi að ekki séu fleiri en 100 einstaklingar í sama rými og að í minni rýmum séu ekki fleiri en svo að hægt sé að tryggja 2 metra fjarlægð milli einstaklinga. 
  • Verslanir, opinberar byggingar og þjónustufyrirtæki sem eru opin almenningi tryggi aðgang að handsótthreinsi fyrir almenning og starfsmenn við innganga og í grennd við yfirborð sem margir snerta, s.s. snertiskjái og afgreiðslukassa, sinni vel þrifum og sótthreinsun yfirborða eins oft og unnt er og minni almenning og starfsmenn á einstaklingsbundnar sóttvarnir með merkingum og skiltum. 
  • Sundlaugar og veitingastaðir tryggi að gestir geti haft 2 metra bil á milli sín í öllum rýmum með fjöldatakmörkun í samræmi við stærð hvers rýmis. 
  • Sóttvarnalæknir leggur til að starfsemi sem í eðli sínu felur í sér að gestir noti sameiginlegan búnað s.s. íþróttastarf, líkamsræktarstöðvar, spilakassar og spilasalir geri hlé á starfsemi eða sótthreinsi slíkan búnað milli notenda. 
  • Sóttvarnalæknir leggur til að söfn, skemmtistaðir og aðrir opinberir staðir geri hlé á starfsemi sé ekki hægt að tryggja að farið sé eftir fjöldatakmörkun eða að bil milli ótengdra aðila sé yfir 2 metrum. 
  • Opnunartími skemmti- og vínveitingastaða verður áfram til kl. 23:00. 
  • Þá mælir sóttvarnalæknir með því að tvöföld sýnataka, við komu og á degi 4-6 ef fyrra sýnið er neikvætt, verði útvíkkuð til allra sem hingað koma frá áhættusvæðum og dvelja hér 10 daga eða lengur með ráðstöfunum í samræmi við heimkomusmitgát þar til neikvæð niðurstaða fæst úr seinni sýnatöku.

„Ef þessi ráðstöfun ber ekki árangur og innlend smit koma upp tengd komufarþegum þrátt fyrir beitingu ofangreindra ráðstafana þarf hugsanlega að efla aðgerðir á landamærum enn frekar,“ segir í minnisblaði sóttvarnalæknis um síðustu tillöguna.

Þá þyrfti að hugleiða eftirfarandi kosti:

  1. Engin sýnataka á landamærum, 14 daga sóttkví fyrir alla sem koma frá áhættusvæði. Þetta úrræði var áður notað vegna ferða frá áhættusvæðum frá upphafi faraldrar fram til 15. júní og er talið hafa átt stóran þátt í því að takmarka umfang faraldursins í vor.
  2. Engin sýnataka á landamærum, sóttkví í 5-7 daga fyrir alla þar sem sýni í veiruleit væri tekið á 5. degi, sóttkví aflétt ef það er neikvætt. Þetta úrræði krefst meiri aðkomu yfirvalda og heilbrigðiskerfis til undirbúnings og samhæfingar heldur en sóttkví í 14 daga en er væntanlega minna íþyngjandi fyrir einstaklinginn.
annalth's picture
Anna Lilja Þórisdóttir
Síðast:
Þessi þáttur er í hlaðvarpi