Tyrkir herða lög um samfélagsmiðla

29.07.2020 - 16:21
epa07960040 (FILE) - A close-up image showing the Facebook app on an iPhone in Kaarst, Germany, 08 November 2017 (reissued 30 October 2019). Facebook will release their 3rd quarter 2019 earnings report on 30 October 2019.  EPA-EFE/SASCHA STEINBACH
 Mynd: EPA
Tyrkneska þingið samþykkti umdeilt lagafrumvarp í dag sem heimilar stjórnvöldum að hafa afskipti af efni sem ratar inn á samfélagsmiðla á borð við Facebook og Twitter. Gagnrýnendur nýju laganna telja markmið þeirra að hefta málfrelsi.

Lögin ná til samfélagsmiðla sem birta að minnsta kosti milljón færslur á dag frá tyrkneskum notendum. Samkvæmt þeim verða fyrirtæki sem reka miðlana að hafa forsvarsmenn í Tyrklandi sem sjá um að fjarlægja óæskilegt efni samkvæmt úrskurði dómstóla. Sé þetta vanrækt eiga fyrirtækin háar sektir yfir höfði sér. Efni tyrknesku notendanna á að vistast á þarlendum netþjóni. Fallist fyrirtækin ekki á að fylgja lögunum eiga þau sektir yfir höfði sér eða að efni miðilsins verður gert óaðgengilegt.

Þingmenn Réttlætis- og þróunarflokks Erdogans forseta og Tyrkneska þjóðernishreyfingin, MHP, samþykktu lagafrumvarpið eftir að deilt var um það fram undir morgun. Stjórnarandstöðuflokkar og mannréttindahópar gagnrýna það harðlega. Þeir óttast að tilgangurinn sé að hefta tjáningarfrelsi í Tyrklandi. Einnig verði aðgangur almennings heftur að hlutlausum upplýsingum eða efni þar sem stjórnvöld eru gagnrýnd. Minnt er á að þúsundum Tyrkja hafi verið refsað fyrir að móðga Erdogan forseta á samfélagsmiðlum.

 

asgeirt's picture
Ásgeir Tómasson
Fréttastofa RÚV
Síðast:
Þessi þáttur er í hlaðvarpi