Ákærður fyrir manndráp, árás og ofsaakstur

Mynd með færslu
 Mynd: Kristinn Þeyr Magnússon - RÚV
Maður, sem er ákærður fyrir að hafa orðið móður sinni að bana í Hafnarfirði í apríl, er einnig ákærður fyrir sérstaklega hættulega líkamsárás og ofsaakstur. Beðið er eftir sakhæfismati en maðurinn hefur verið vistaður á réttargeðdeild.

Ákæran á hendur manninum var þingfest í Héraðsdómi Reykjaness í síðustu viku.

Þar er honum gefið að sök að hafa orðið móður sinni að bana með því að stinga hana tvisvar sinnum með hnífi í brjóstið. Hann er einnig sagður hafa veist að manni með hnífi, skorið hann í andlit og stungið í vinstri handlegg.

Fram kemur í ákærunni að maðurinn sé krafinn um níu milljónir í miskabætur vegna manndrápsins og árásinnar. 

Þá er maðurinn ákærður fyrir ofsaakstur í júní fyrir tveimur árum. Fram kom í fréttum að um þrettán lögreglubílar, merktir og ómerktir, hefðu tekið þátt í eftirförinni.

Samkvæmt ákæru ók maðurinn þegar mest lét á 197 kílómetra hraða. Lögreglubíl var ekið utan í bíl mannsins til að reyna að stöðva hann og það tókst í annarri tilraun á Kjósárskarðsvegi.  

Þá hafði maðurinn ekið tugi kílómetra á ofsahraða, umferð úr gagnstæðri átt þurfti að sveigja frá og litlu mátti muna að árekstur yrði við Listabraut þegar hann ók yfir á rauðu ljósi

 

freyrgigja's picture
Freyr Gígja Gunnarsson
Fréttastofa RÚV
Síðast:
Þessi þáttur er í hlaðvarpi