Skógar Síberíu brenna í hitabylgju við heimskautsbaug

13.07.2020 - 05:30
Erlent · Hamfarir · Asía · Skógareldar · Evrópa
This image taken from video provided by Russian Emergency Ministry, shows a Russian Emergency Ministry multipurpose amphibious aircraft releasing water to extinguish the fire in the Trans-Baikal National Park in Buryatia, southern Siberia, Russia, Thursday, July 9, 2020. About 910 hectares of forest were alight over this area of the Russia's region, according to the ministry of emergency situations. (Russian Emergency Ministry Press Service via AP)
Flugvél sleppir vatni yfir logandi skóga Síberíu um helgina. Það voru hins vegar aðrar vélar sem dreifðu efnum í skýin til að framkalla rigningu, með góðum árangri.  Mynd: AP
Margir stórir skógareldar brenna enn í Síberíu, þar sem óvenju miklir hitar og þurrkar hafa skapað kjöraðstæður fyrir slíkar hamfarir. Um helgina börðust rússneskir slökkviliðsmenn við nær 160 skógarelda á samtals 46.000 hekturum lands í Síberíu, þar sem neyðarástandi hefur verið lýst yfir í fjölda héraða.

„Manngerð rigning“ gegn eldunum

Slökkviliðsmönnunum hefur þó orðið töluvert ágengt í baráttu sinni við eldana, sem loguðu á þrefalt stærra svæði fyrir nokkrum dögum. Þetta má fyrst og fremst rekja til þess að efnum hefur verið dreift í skýjabakka yfir skógareldum fjarri mannabyggðum, til að koma af stað rigningu. Það verkefni hefur gengið vonum framar.

Flogið er upp í skýjabakkana og milljónum örsmárra efnisagna sprautað inn í skýin, sem verður til þess að vatnsgufan þéttist utan um þær og myndar dropa, sem síðan falla til jarðar í formi regns. „Menn hafa í raun skapað tilbúna rigningu," hefur sænska ríkissjónvarpið SVT eftir veðurfræðingnum Nitzan Cohen.

46.000 ferkílómetrar brunnir

Í frétt SVT segir að umhverfisverndarsamtökin Greenpeace, sem fylgjast grannt með eldunum í Síberíu, staðfesti að rigningin hafi vissulega hjálpað til að slökkva eldana á nokkrum stöðum. Annars staðar hafi hins vegar nýir eldar blossað upp, svo sem nærri borgunum Irkutsk og Krasnoyarsk.

Sérfræðingar Greenpeace áætla að alls hafi ríflega 4,6 milljónir hektarar - eða 46.000 ferkílómetrar - af síberískum skógum brunnið frá áramótum.

Hitabylgja og hitamet

Miklir hitar hafa geisað í Síberíu síðustu vikur og Copernicus, umhverfisrannsóknastofnun Evrópusambandsins, upplýsir að meðalhitinn á norðurskautssvæðinu og Síberíu í júní hafi verið rúmlega fimm gráðum yfir meðallagi.

Hitamet var slegið á norðurskautssvæðinu laugardaginn 20. júní, þegar hitinn fór í 38 gáður í síberíska þorpinu Verkhoyansk. Hlýindin ýta undir að eldarnir logi áfram glatt, sem veldur gríðarlegri losun gróðurhúsalofttegunda, sem aftur ýtir undir frekari hlýindi. 

 

Ævar Örn Jósepsson
Fréttastofa RÚV
Síðast:
Þessi þáttur er í hlaðvarpi