Réttarhöldum yfir Netanyahu frestað

24.05.2020 - 14:42
Erlent · Erlent · Ísrael · Netanyahu
epa07548120 Israeli Prime Minister Benjamin Netanyahu attends the weekly cabinet meeting at the Prime Minister's office in Jerusalem, Israel, 05 May 2019. Media reports state that more than 250 rockets have been fired into Israel by millitants and Israel have replied with air strikes and tank fire on the Palestinian territory.  EPA-EFE/ABIR SULTAN / POOL EPA POOL
Benjamin Netanyahu, forsætisráðherra Ísraels. Mynd: EPA-EFE - EPA POOL
Fyrsta degi réttarhalda yfir Benjamin Netanyahu, forsætisráðherra Ísraels lauk eftir tæplega klukkustund síðdegis í dag. Netanyahu tjáði sig ekkert í réttarhöldunum að öðru leyti en því að segja til nafns. Verjendur hans kröfðust þess að réttarhöldunum yrði frestað til þess að þeir gætu farið betur ofan í gögn málsins. Það var gert og ekki var tilkynnt hvenær málinu verður fram haldið.

 

Vika er síðan Netanyahu var svarinn í embætti forsætisráðherra í fimmta sinn. Netanyahu er ákærður fyrir svik, trúnaðarbrest og mútuþægni. Hann neitar alfarið sök og hefur ítrekað sagt ásakanirnar vera nornaveiðar gegn sér og fjölskyldunni. Réttarhöldin áttu að hefjast um miðjan mars, en var frestað vegna kórónuveirufaraldursins. 

Sérsveit lögreglu rannsakaði mál Netanyahus í nokkur ár. Að rannsókn lokinni lagði sérsveitin til að forsætisráðherrann yrði ákærður. Ríkissaksóknarinn Avichai Mandelbit birti svo í fyrra ákærur gegn Netanyahu í þremur liðum. Netanyahu er meðal annars sakaður um að hafa þegið gjafir á borð við vindla, bleikt kampavín, skartgripi og flugmiða frá auðugum vinum að andvirði um milljón ísraelskra shekela, jafnvirði um 40 milljóna króna. Eins er hann sakaður um að hafa reynt að fá eitt stærstu dagblaða Ísraels til þess að fegra umfjöllun sína um hann, gegn því að hann gerði samkeppnisaðila erfiðara fyrir. Þá er Netanyahu einnig sakaður um að hafa lagt til reglugerðarbreytingar sem komu sér vel fyrir Shaul Elovitch, einn stærsta hluthafann í fjarskiptafyrirtækinu Bezeq. Í staðinn átti Netanyahu og fjölskylda hans að hafa fengið jákvæða umfjöllun í vefmiðlinum Walla, sem er í eigu Elovitch.

 

palmij's picture
Pálmi Jónasson
Fréttastofa RÚV
Síðast:
Þessi þáttur er í hlaðvarpi