120 milljónir í endurgerð á opnum leiksvæðum í borginni

07.05.2020 - 14:01
Mynd með færslu
 Mynd: Reykjavíkurborg
Reykjavíkurborg ætlar að verja 120 milljónum króna í að endurgera fimm opin leiksvæði í sumar. Ekki er um árlegt viðhald að ræða, heldur eru um að ræða svæði sem komin eru á tíma og forgangsraða þurfti eftir ástandsskoðun.

Opnu leiksvæðin sem verða endurgerð í sumar eru við Bogahlíð, Bústaðaveg, Seiðakvísl, Snæland og Öldugötu. Það sem nýta verður nýtt á svæðunum á meðan öðru verður skipt út. Framkvæmdum er forgangsraðað innan hvers hverfis fyrir sig þannig að unnið sé þvert á borgina. Opin leiksvæði eru önnur leiksvæði en þau sem eru við grunnskóla og leikskóla.

Endurgerðin felur í sér landmótun, endurnýjun gróðurbeða, leiktækja og yfirborðsefna eftir þörfum. Áhersla er á öryggismál eins og fallvarnarefni og bætta lýsingu og aðgengi fyrir alla, segir í tilkynningu frá borginni.

Útboð verða opnuð í maí. Búist er við að framkvæmdir hefjist í lok mánaðar og að þær standi fram í október.

Hér má sjá teikningar af því hvernig leiksvæðin koma til með að líta út eftir endurgerð.