Nokkuð róstusamt hefur verið í Malí síðustu misseri og vígamenn gert nokkrar mannskæðar árásir á ári hverju. Mynd: EPA
Fjórir hermenn og tugir vígamanna féllu í Níger
Fjórir nígerskir stjórnarhermenn og tugir vígamanna, sem taldir eru tilheyra íslömskum hryðjuverkasamtökum, féllu í hörðum bardaga í vesturhluta Níger á fimmtudag. Þetta kemur fram í tilkynningu nígerska varnarmálaráðuneytisins, sem birt var í fjölmiðlum í kvöld. Þar segir að sveit stjórnahermanna hafi ráðist á bækistöðvar hryðjuverkamanna í Tillaberi-héraði nærri landamærunum að Malí á fimmtudag.
Eftir hörð átök, þar sem 63 hryðjuverkamenn féllu í valinn, lögðu þeir sem eftir lifðu á flótta, segir í tilkynningu ráðuneytisins, og skildu eftir mikið vopnabúr og fjölda vélhjóla.
Mótorhjól bönnuð
Tillaberi-hérað liggur að landamærum hvorutveggja Malí og Búrkína Fasó og hefur notkun og sala mótorhjóla verið bönnuð þar síðan í janúar. Er það gert í viðleitni til að hamla árásum hryðjuverkasveita í héraðinu, sem gjarnan nota slíka farskjóta við ódæðisverk sín. Samkvæmt opinberum tölum drápu vígasveitir öfga-íslamista 174 hermenn í þremur mótorhjólaárásum í desember og janúar síðastliðnum.
Íslamska ríkið lýsti tveimur árásanna á hendur sér. Um 4.000 manns féllu í hryðjuverkaárásum íslamista í Níger, Malí og Búrkína Fasó á síðasta ári, samkvæmt upplýsingum Sameinuðu þjóðanna.
